Policia e Kosovës ka raportuar për disa raste të dhunës në familje të ndodhura brenda 24 orëve të fundit në disa qytete të vendit, ku viktimat kryesisht janë gra, ndërsa të dyshuarit janë familjarë të tyre.
Në Prishtinë, është raportuar se një grua është sulmuar fizikisht nga bashkëshorti i saj pas një mosmarrëveshjeje. Viktima ka marrë trajtim mjekësor, ndërsa pas intervistimit, me vendim të prokurorit, të dy janë liruar në procedurë të rregullt.
Po ashtu në Prishtinë, sipas policisë, janë arrestuar dy vëllezër pas një përleshjeje fizike mes tyre. Pas intervistimit, njëri prej tyre është dërguar në mbajtje, ndërsa tjetri është liruar në procedurë të rregullt.
Në Deçan është raportuar një rast tjetër i dhunës në familje, ku një grua është sulmuar nga një burrë, i dyshuar si anëtar i familjes.
Viktima është dërguar në QKMF Deçan, ku është konstatuar se ka pësuar lëndime të lehta trupore. I dyshuari ndodhet në arrati dhe policia është në kërkim të tij.
Në Gjakovë është arrestuar një burrë pasi kishte shqetësuar në vazhdimësi bashkëshorten e tij. Pas intervistimit, me vendim të prokurorit, i dyshuari është dërguar në mbajtje.
Një rast tjetër është raportuar në Vushtrri, ku një grua ka njoftuar policinë se është sulmuar fizikisht nga bashkëshorti i saj pas një mosmarrëveshjeje. Viktima ka pranuar trajtim mjekësor, ndërsa të dy janë intervistuar dhe janë liruar në procedurë të rregullt me vendim të prokurorit.
