Këshilli Koordinues i shoqatave të dala nga lufta, doli në përkrahje të protestës së nesërme që do të mbahet në Tiranë, me qëllim të kundërshtimit të padrejtësive ndaj krerëve të UÇK-së në procesin gjyqësor në Hagë, derisa theksoi se bëhet fjalë për një luftë të lavdishme që solli lirinë e Kosovës.
“Nëse ka drejtësi krerët e UÇK-së do të lirohen, do të kthehen faqebardhë dhe krejt kjo re e zezë që i është veshur Republikës së Kosovës dhe mbarë kombit shqiptar, një herë e përgjithmonë të hiqet dhe të përfundojnë”, tha Xhavit Jashari, kryetari i SHFDK-së.
Ndërsa Shefik Sadiku, kryetar i Shoqatës së të Burgosurve Politikë, pret që Gjykata Speciale të jetë transparente dhe ta përfundojë sa më shpejt mandatin e saj për të mos prodhuar padrejtësi të tjera.
“Ne e mbështesim protestën që do të mbahet në Tiranë, urojmë që të jetë më masive. I kemi mbështetur edhe më herët protestat, gjithashtu mbështesim edhe lëvizjen me motoçikleta nga Prekazi heroik drejt Evropës për në Hagë e në Bruksel”, tha Sadiku.
Përfaqësuesit e këtyre organizatave theksuan se nesër do të nisen drejt Tiranës në mbështetje të UÇK-së dhe luftës çlirimtare, kundër padrejtësive të procesit gjyqësor në Hagë.
