Në Gjykatën Themelore në Prishtinë po mbahet seanca e radhës gjyqësore për ish-kryeshefin e Korporatës Energjetike të Kosovës, Nagip Krasniqi. Në seancë po dëshmon Hasan Kerolli, ekspert i lartë për analiza të tregut dhe tregtim të energjisë në KEK.
Ai tregoi se përkundër që Zyra e Rregullatorit të Energjisë Elektrike u kishte kërkuar që të mos tregtonin energji elektrike me operatorë të pa licencuar , një gjë e tillë ishte bërë me kompaninë sllovene “Holding Slovenske Elektrane”.
Kerolli tha se pas ndalesës së ZRRE -së që të tregtohej me operator të pa licencuar u ishte drejtuar me email drejtorit operativ, kryeshefit Nagip Krasniqi e personave tjerë për të ditur se si të veprohej tutje. Ai potencoi se i ishte kërkuar që të vazhdonte njëjtë me tregtim, përfshirë edhe me operatorët e pa licencuar.
“Në dhjetor 2021 kemi bërë edhe blerjen e energjisë, qoftë për nevoja të KEK-ut, por edhe blerjen e energjisë për shërbim universal për KESCO-n, që ka ardhur me vendim nga Qeveria e Kosovës. Blerja ka filluar rreth datës 22 dhjetor, kemi vazhduar fillimisht deri më 10 janar 2022. Pastaj kemi blerë edhe më 21-22 janar. Pastaj KESCO e ka bërë importin e energjisë. Shitjen e energjisë varësisht kur kemi pasur teprica e bëjmë në baza ditore. Ne e kemi bërë me kompani që kanë qenë të regjistruara në Kosovë dhe kanë pasur licencë. Deri në vitin 2022 nuk kemi pasur ndonjë njoftim nga ZRRE që është e ndaluar, ka qenë e lejuar që të bëjmë tregtim me këto kompani. Në vitin 2022 Zyra për Tarifa dhe Çështje Rregullative e cila ka komunikim me ZRRE-në ka pranuar njoftimin që të ndërpresë tregtimin me kompanitë që nuk janë të regjistruara në Kosovë ose nuk kanë licencë. Pasi kemi pranuar njoftimin unë i jam drejtuar drejtorit operativ, i përfshirë në email ka qenë edhe Nagip Krasniqi e kolegë tjerë. Kam kërkuar se si të veprohet pas njoftimit nga ZRRE, pastaj kam marrë përgjigje nga Edmond Nulleshi që gjatë asaj kohe për çështje të tregtimit ka qenë duke e zëvendësuar Luigj Imerin. Na ka udhëzuar që me vazhdua tregtimin me gjitha kompanitë deri në një njoftim të radhës”, ka deklaruar ai.
Krasniqi po dyshohet se i ka shkaktuar KEK-ut dëm mbi 3.2 milionë euro dhe mbi 500 mijë euro shmangie tatimore në dëm të Kosovës.
Aktakuza thotë se Krasniqi në cilësinë e kryeshefit të KEK-ut nga 15 tetori me qëllim që operatorit ekonomik “Holding Slovenske Elektrane” SE nga Sllovenia t’ia mundësojë tregtimin e energjisë në Kosovë, në kundërshtim me Ligjin për Energjinë Elektrike dhe atë për Rregullatorin e Energjisë, kishte nënshkruar kontrata si dhe kishte vazhduar tregtimin me këtë operator edhe pse ishte në dijeni se nuk mund të tregtohej me të pasi nuk i njihej licenca nga ZRRE.
