Huthitët e Jemenit kanë njoftuar se Shefi i Shtabit të tyre, Muhammad Abd Al-Karim-al-Gamari, një nga zyrtarët më të shquar ushtarakë të lëvizjes pro-iraniane, u vra në “krye të detyrës”.
Pa e akuzuar drejtpërdrejt Izraelin për vrasjen, Huthitët njoftuan vetëm se konflikti me atë shtet nuk kishte mbaruar dhe se ai do të “ndëshkohej për krimet që kreu”.
Në gusht, Izraeli shënjestroi Shtabin e Përgjithshëm, Ministrin e Mbrojtjes dhe zyrtarë të tjerë të lartë në një sulm ajror në kryeqytetin jemenas, Sanaa. Kryeministri i qeverisë Huthi të Jemenit dhe disa ministra të tjerë u vranë në sulme.
Izraeli më pas njoftoi se al-Ghamari, ministri i mbrojtjes dhe zyrtarë të tjerë ishin shënjestruar dhe se do të konfirmonte rezultatet e sulmit. Gamari ishte anëtar i “Zyrës së Xhihadit” të Huthit, përgjegjës për mbikëqyrjen e operacioneve ushtarake të udhëhequra nga Abdul Malik al-Houthi, vëllai i themeluesit të vrarë të lëvizjes. Ministri izraelit i Mbrojtjes, Israel Katz, njoftoi të enjten se Gamari ishte shënjestra e një sulmi izraelit. “Ne do të bëjmë të njëjtën gjë kundër çdo kërcënimi në të ardhmen”, shtoi ai.
Huthët nisën sulme me raketa ndaj Izraelit, duke thënë se ky ishte një akt solidariteti me palestinezët në Gaza. Shumica e këtyre raketave u rrëzuan dhe Izraeli u përgjigj me sulme ndaj pjesëve të Jemenit të kontrolluara nga Huthët.
Lëvizja jemenase shënjestroi gjithashtu anijet në Detin e Kuq, duke u përpjekur të prishte rrugët tregtare me qëllim ndalimin e ofensivës në Gaza. Malik al-Houthi njoftoi javën e kaluar se grupi do të vazhdonte sulmet ndaj Izraelit nëse ky i fundit nuk do të respektonte marrëveshjen e armëpushimit në enklavën palestineze, raporton Reuters.
