Kryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati u shpreh sot nga sheshi “Skënderbej” në Tiranë, se “proceset që po bëhen në Hagë janë të njëanshme dhe të padrejta”.
Gjatë protestës në mbështetje të ish-krerëve të UÇK-së të cilët po gjykohen në Hagë, Gucati u shpreh se “ne sot po protestojmë për të ngritur zërin për drejtësi”.
“Jemi këtu për të mbrojtur luftën e e shenjtë të UÇK-së, për të mbrojtur gjakun e derdhur për liri dhe për të mbrojtur nderin e çlirimtarëve tanë. UÇK nuk ka nevojë të dëshmojë se ka qenë ushtri çlirimtare. Këtë e ka dëshmuar historia, populli, varret e dëshmorëve dhe ndërkombëtarët. Bota mbarë pa me sytë e vetë krimet serbe në Kosovë”, tha ai.
Gucati u shpreh se “sot përmes kësaj gjykate të padrejtë, po mundohen të barazojnë viktimën me xhelatin”.
“Duan të njollosin luftën tonë të shenjtë, por ne nuk do ta lejojmë dhe nuk do ta pranojmë të përdhoset emri i komandantëve tanë”, u shpreh ai.
Gucati theksoi se “kjo protestë nuk ka lidhej me politikën por është protestë e popullit shqiptar”.
“Ne nuk po kërkojmë mëshirë, po kërkojmë drejtësi para ligjit dhe para historisë. Tirana sot është kryeqyteti i të gjithë shqiptarëve. Sot nga këtu po i themi botës: Kosova ka luftuar për liri, nuk ishin kriminelë por bijtë tanë të këtij kombi që dhanë gjithçka për atdhe”, u shpreh ai.
Ndaj, vijoi Gucati, “ne deklarojmë sot se Gjykata Speciale ka humbur çdo besim te shqiptarët”.
“Proceset që po bëhen në Hagë janë të njëanshme dhe të padrejta. Kjo protestë është thirrja e ndërgjegjes sonë kombëtare. Drejtësia e vërtetë nuk ka frikë nga e vërteta dhe ne jemi këtu për ta mbrojtur”, u shpreh Gucati.
Protesta në mbështetje të ish-krerëve të UÇK-së të cilët po gjykohen në Hagë nisi pasditen e sotme në sheshin “Skënderbej në Tiranë”, ku mijëra qytetarë nga trojet shqipfolëse dhe diaspora nderuan sakrificat e ushtarëve dhe krerëve të UÇK-së, lufta e të cilëve solli lirinë dhe pavarësinë e Kosovës me mbështetjen e partnerëve ndërkombëtarë.
