Kitaristi Paul Daniel “Ace” Frehley, një nga anëtarët themelues të grupit Kiss, ka ndërruar jetë në moshën 74-vjeçare.
Agjenti i muzikantit tha se Frehley vdiq i rrethuar nga familja në Morristown, New Jersey, pas një rrëzimi të kohëve të fundit.
Ace Frehley, së bashku me Gene Simmons, Paul Stanley dhe Peter Criss, ishte pjesë e formacionit origjinal të Kiss. Siç vëren CNN, Frehley është i pari nga anëtarët themelues të grupit që vdes.
Simmons dhe Stanley lëshuan një deklaratë të përbashkët duke thënë se Frehley “ishte një ushtar i rëndësishëm dhe i pazëvendësueshëm i rokut”. “Ai është dhe gjithmonë do të jetë pjesë e trashëgimisë së Kiss”, theksuan ata.
Frehley ishte anëtar i Kiss nga viti 1973 deri në vitin 1982. Më pas ai u largua nga grupi për të ndjekur një karrierë solo, por u rikthye në mesin e viteve 1990 kur formacioni origjinal i grupit u ribashkua. Frehley performoi me Kiss për herë të fundit në vitin 2001 dhe më pas u rikthye në projekte solo.
