Policia e Kosovës vazhdon me iniciativën për të prezantuar policët e lagjeve në të gjitha zonat, si pjesë e përkushtimit për ndërtimin e besimit të ndërsjellë dhe bashkëpunimit me komunitetin.
Krahas ruajtjes së rendit dhe sigurisë publike, kjo iniciativë ka për qëllim rritjen e transparencës, përmirësimin e komunikimit dhe nxitjen e përfshirjes aktive të qytetarëve në çështje që ndërlidhen me sigurinë.
Major Ramadan Ahmeti nga Drejtoria e Policisë në Bashkësi dhe Preventivë për Radio Kosovën thotë se Polici i lagjes është i pranishëm në mënyrë aktive në komunitet, duke ofruar mbështetje, këshillim dhe reagim të shpejtë ndaj shqetësimeve të qytetarëve.
“Policët e lagjes kanë për qëllim që të ndërtojnë raporte të mira me qytetarët. Të kenë mirëbesim në mes veti duke ndërtuar një lloj partneriteti. Qytetarët marrin përgjegjësi për sigurinë në zonën e tyre”, ka thënë Ahmeti.
Ky bashkëpunim nuk është vetëm një marrëveshje formale, por një angazhim i përbashkët për të ndërtuar një komunitet më të sigurt, më të bashkuar dhe më të përgjegjshëm thotë Ramadani. Ai sqaron se policët e lagjes janë publik dhe të qasshëm për opinionin.
“Në faqen e Policisë së Kosovës janë postuar të gjithë policët e lagjeve ku secili qytetarë mund të hyjë në web faqen e policisë dhe aty munden ti shohin se kush janë policët me emër dhe mbiemër, ka shtuar Major Ahmeti.
Qytetarët thonë se i njohin mirë lagjet e tyre, rrugët, sfidat dhe nevojat e përditshme.
Por për ta bërë rendin dhe qetësin në mënyrë më efektive, nevojitet komunikim dhe bashkëpunim i vazhdueshëm.
“Si qytetare, e vlerësoj shumë bashkëpunimin ndërmjet Policisë së lagjes dhe qytetarëve. Mendoj se është një hap shumë i rëndësishëm dhe i qëlluar në drejtim të ruajtjes së qetësisë dhe rendit në komunitetin tonë. Personalisht, deri tani nuk kam pasur rast të raportoj ndonjë rast të paligjshëm apo ndonjë krim, por mendoj se është e rëndësishme të dimë se nëse ndodh një situatë e tillë në të ardhmen, tashmë e kemi një kanal të drejtpërdrejtë komunikimi dhe bashkëpunimi me Policinë”, ka thënë një qytetare për Radio Kosovën.
Ndryshe të gjithë zyrtarët policorë janë në shërbim të drejtpërdrejtë për të adresuar nevojat dhe shqetësimet e qytetarëve, për të ruajtur rendin, qetësinë dhe për të ndërtuar së bashku një ambient të sigurt për të gjithë.
Sa më shumë që të zhvillohen këshillat e sigurisë dhe policët e lagjes, sipas eksperteve te sigurisë aq më e madhe është siguria dhe do të shihen rezultatet në të gjitha komunat dhe komunitetet në tërësi.
