Një djalosh vetëm 10-vjeçar nga Ferizaj ka treguar ndershmëri dhe edukatë të lartë qytetare, duke dorëzuar në polici një portofol të gjetur me para dhe dokumente personale.
Sipas njoftimit të Policisë së Kosovës, sot rreth orës 16:00, në Stacionin Policor në Ferizaj është paraqitur qytetari N. Dashi së bashku me djalin e tij E. D. (10-vjeç), të cilët kishin gjetur një portofol në rrugën “Enver Topalli” në Ferizaj.
“Në portofol ishin 1130 euro, 20 franga zvicerane dhe 130 denarë maqedonas, si dhe dokumente personale. Pas verifikimit, policia ka arritur të identifikojë pronarin B. B. nga Kaçaniku, i cili është paraqitur menjëherë në stacionin policor dhe ka konfirmuar se të gjitha sendet dhe paratë ishin të paprekura. Pronarit i janë kthyer të gjitha me procesverbal, ndërsa ai ka shprehur mirënjohje dhe falënderim të sinqertë ndaj djaloshit dhe familjes së tij për gjestin e ndershëm, si dhe ndaj Policisë së Ferizajt për profesionalizmin dhe bashkëpunimin korrekt”, thuhet në njoftim.
Drejtoria Rajonale e Policisë në Ferizaj ka falënderuar publikisht djaloshin E. D. për këtë veprim human dhe shembullor, duke e cilësuar si një akt që pasqyron vlera të larta morale, familjare dhe qytetare.
Ky gjest, siç thuhet tutje në njoftim, është një shembull frymëzues për të gjithë fëmijët dhe qytetarët mbi ndershmërinë, edukatën dhe përgjegjësinë shoqërore.
