Në kinema “13 Shtatori” u zhvillua një veprimtari përkujtimore kushtuar poetit të kombit simbolit të dashurisë për atdheun, dijen dhe gjuhën shqipe.
Në këtë mbrëmje nderimi morën pjesë Prof. Përparim Kabo, historiani Kastriot Bezati, Ligoraq Riza, Sadik Shala, Neki Lulaj dhe Murat Bytyqi, të cilët ndanë reflektime mbi jetën, veprën dhe mesazhin e përjetshëm të poetit.
Prof. Kabo e cilësoi Naim Frashërin si “një hero të muzës dhe të lirisë”, poetin që ndërtoi identitetin tonë kombëtar dhe mbolli dashurinë për atdheun në çdo varg.
Historiani Bezati foli për lidhjen e veprës së Naimit me historinë dhe rrënjët kulturore të Frashërit dhe Përmetit.
Gjatë aktivitetit u interpretuan poezi të Naimit nga aktori Ligoraq Riza, poeti Neki Lulaj dhe fëmijët e shkollave të Përmetit.
U prezantua gjithashtu nisma për vendosjen e datës 25 maj si Dita Mbarëkombëtare e Kulturës Shqiptare. Kjo nismë ka marrë mbështetjen e shumë figurave të shquara të artit dhe kulturës, dhe projekt-propozimi do t’i dërgohet Ministrisë së Turizmit, Kulturës dhe Sportit.
Nga Përmeti, vendi i rrënjëve të Frashëllinjve, kujtojmë me krenari figurën e poetit që i dha Shqipërisë dritën e fjalës dhe dashurinë për dijen.
