Kryetari i degës së Lidhjes Demokratike të Kosovës në Vushtrri, Xhafer Tahiri, ka nënshkruar marrëveshje koalicioni me kandidatin e Lëvizjes Vetëvendosje, Sylejman Meholli, për balotazhin e 9 nëntorit. Në nënshkrimin e marrëveshjes ka qenë i pranishëm edhe kryetari i LVV-së, Albin Kurti.
Kryetari i Lëvizjes Vetëvendosje, Albin Kurti, ka deklaruar se kjo marrëveshje synon bashkëqeverisje pas 9 nëntorit me kandidatin për kryetar të komunës, Sylejman Meholli, dhe ekipin e tij drejtues.
“Le të punojmë jo çdo ditë, por çdo orë që këtë marrëveshje për bashkëqeverisje që e bëmë sot ta realizojmë pas 9 nëntorit me kryetarin Sylejman Meholli dhe drejtorët që do të bëjnë punë të mira për të gjithë qytetarët e Vushtrrisë pa dallim, të cilën e duam shumë e edhe ajo na do neve shumë”, ka theksuar Kurti.
Ndërkaq, kryetari i degës së LDK-së në Vushtrri, Xhafer Tahiri, ka deklaruar se ky koalicion nuk është kundër askujt, por në funksion të së mirës së qytetit.
“Duke qenë besimtar, unë mendoj se e mira duhet të kthehet me të mirë. Në vitin 2017 LVV-ja ka mbështetur ndryshimin në Vushtrri, ndërsa sot LDK e kthen këtë mbështetje me qëllim që të bëhet një ndryshim i domosdoshëm në qytetin e Vushtrrisë”, ka theksuar Tahiri.
Më 9 nëntor në balotazh në këtë komunë do të përballen Ferit Idrizi i PDK-së, i cili ka marrë 45.33% të votave, dhe Sylejman Meholli i VV-së me 30.77%. Xhafer Tahiri i LDK-së në zgjedhjet e 12 tetorit ka marrë 19.81% të votave.
