Rreth 180 tifozë të skuadrës italiane Napoli janë arrestuar në qendër të qytetit Eindhoven, në Holandë, pak orë para ndeshjes së Ligës së Kampionëve kundër PSV Eindhoven.
Sipas policisë lokale, arrestimet u kryen si masë parandaluese, pa pasur incidente apo përleshje fizike midis tifozëve. Autoritetet ndërhynë për të shmangur çdo përshkallëzim të mundshëm të situatës.
“Masa u mor për të parandaluar trazira të mundshme,” deklaroi një zëdhënës i policisë, duke shtuar se nuk ka pasur përplasje mes tifozëve italianë dhe atyre holandezë, raporton agjencia e lajmeve “ANP”.
Policia kishte kërkuar që tifozët e Napolit të largoheshin nga qendra e qytetit, por ata nuk respektuan urdhrin, çka çoi në arrestimin e tyre për shkelje të rregullores komunale mbi grumbullimet publike.
Tifozët e ndaluar u transportuan me autobusë drejt stacionit policor në rrugën Mathildelaan, ku po merren në pyetje.
Sipas medieve holandeze disa prej të ndaluarve nuk kishin bileta për ndeshjen PSV – Napoli.
Autoritetet holandeze kanë paralajmëruar se do të mbajnë masa të rrepta sigurie gjatë dhe pas ndeshjes, për të shmangur çdo incident mes tifozerive.
