Një gjykatë e specializuar penale në Sllovaki ka dënuar sot me 21 vjet burg Juraj Cintulën, 72 vjeç, i cili në maj të vitit të kaluar kishte qëlluar dhe plagosur rëndë kryeministrin Robert Fico.
Vendimi u dha nga Gjykata e Specializuar Penale në qytetin Banska Bystrica, e cila e shpalli Cintulën fajtor për terrorizëm, duke e cilësuar sulmin si përpjekje për të ndikuar në veprimtarinë e qeverisë, raporton Reuters.
Ngjarja ndodhi më 15 maj 2024, në qytetin qendror Handlová, ku Fico ishte duke përshëndetur qytetarët pas një takimi qeveritar.
Cintula hapi zjarr nga një distancë prej më shumë se një metri, duke qëlluar pesë herë.
Kryeministri Fico u plagos katër herë, në bark, në ije, në dorë dhe në këmbë, duke rrezikuar seriozisht jetën.
Pas disa javësh në spital, ai u rikthye në publik në korrik të atij viti.
Në gjyq, Cintula pranoi se kishte qëlluar, por tha se nuk kishte dashur ta vriste Ficon, vetëm ta ndalonte nga politikat që, sipas tij, dëmtonin lirinë dhe kulturën sllovake.
Gjykata konstatoi se motivi i tij ishte politik dhe se akti përbënte terrorizëm. Vendimi nuk është ende përfundimtar dhe mund të apelohet në Gjykatën Supreme të Sllovakisë.
Ky proces ka rikthyer në vëmendje ndarjet e thella politike në vend, ku qeveria e Ficos akuzohet nga opozita për dobësim të institucioneve demokratike dhe afrim me Rusinë.
