Ministria e Financave, Punës dhe Transfereve ka dalë me sqarim për opinionin publik sa i përket paraqitjes së pensionistëve çdo gjashtë muaj në zyrat e pensionistëve.
Kjo ministri thotë se tashmë ekzistojnë ekipet mobile që vizitojnë në shtëpi pensionistët që duhet të lajmërohen çdo gjashtë muaj, por e kanë të pamundur ta bëjnë këtë në zyrat e pensioneve për shkak të arsyeve shëndetësore.
“Që nga muaji gusht 2023, Ministria ka lansuar projektin e lajmërimit në shtëpi të pensionistëve, përmes ekipeve mobile që vizitojnë pensionistët në adresën e tyre të banimit. Me qëllim të lehtësimit të procedurave, pensionistët me probleme shëndetësore si dhe ata mbi moshën 80 vjeçare mund të dërgojnë kërkesë përmes telefonit ose e-mailit, dhe ekipi mobil i Ministrisë shkon në shtëpi për të realizuar procesin e verifikimit”, thuhet në sqarimin e MFPT-së.
Tutje, kanë thënë se kërkesën mund ta bëjë vetë pensionisti apo dikush nga familjarët, dhe sipas tyre, mjafton të ofrohen të dhënat e sakta të pensionistit dhe arsyet e kërkesës.
“Ekipet mobile punojnë 7 ditë në javë, për të siguruar që të gjitha familjet të vizitohen në kohë dhe në mënyrë të rregullt. Pensionistët apo anëtarët e tyre të familjes mund të dërgojnë kërkesat për lajmërim përmes adresave elektronike ose numrave të telefonit, varësisht nga rajoni”, ka thënë Ministria e Financave, Punës dhe Transfereve.
Tutje kjo ministri ka bërë publike adresat elektronike dhe numrat e telefonit për ata që kanë nevojë të marrin një shërbim të tillë.
Prishtinë – pensionet.pr@rks-gov.net | 038 213 268
Pejë – pensionet.pj@rks-gov.net | 039 431 217
Gjakovë – pensionet.gjk@rks-gov.net | 039 326 999
Gjilan – pensionet.gji@rks-gov.net | 028 324 555
Ferizaj – pensionet.fe@rks-gov.net | 0290 320 403
Mitrovicë – pensionet.mi@rks-gov.net | 028 533 010
MFPT thotë se mbetet e përkushtuar që pensionistët të mos përballen me vështirësi gjatë procesit të lajmërimit dhe që shërbimet të jenë sa më afër qytetarëve.
