Policia e Kosovës ka bërë të ditur se gjatë 24 orëve të fundit, në disa qytete të vendit janë regjistruar disa raste të dhunës në familje, për të cilat është ndërhyrë me kohë dhe janë ndërmarrë veprimet e nevojshme ligjore.
Në Obiliq, policia ka shoqëruar një çift kosovar që kishte qenë duke bashkëjetuar, pasi pas një mosmarrëveshjeje kishin sulmuar fizikisht njëri-tjetrin. Të dy kanë pranuar tretman mjekësor. Është bërë e ditur se femra kishte urdhër mbrojtës ndaj mashkullit, por pa njoftuar policinë kishin vendosur të jetojnë sërish bashkë. Me vendim të prokurorit, është iniciuar rasti dhe palët janë liruar në procedurë të rregullt.
Në Prishtinë është raportuar se një person ka ushtruar dhunë fizike ndaj bashkëshortes dhe vajzës së tij. Viktimave u është ofruar ndihmë mjekësore, ndërsa i dyshuari është në arrati. Policia është në kërkim të tij dhe rasti po hetohet.
Në Shtërpcë, është raportuar për një mosmarrëveshje ndërmjet një femre dhe një mashkulli kosovar. Të dy janë shoqëruar në stacion policor, ku pas intervistimit janë liruar me vendim të prokurorit. Rasti do të procedohet në mënyrë të rregullt.
Edhe në Prizren është arrestuar një person që kishte ushtruar dhunë psikike ndaj babait të tij. Gjatë arrestimit, i dyshuari ka sulmuar edhe zyrtarët policorë, duke lënduar njërin prej tyre, i cili ka pranuar tretman mjekësor. I njëjti ka shkaktuar dëme edhe në zyrën policore. Me vendim të prokurorit, i dyshuari është dërguar në mbajtje.
Në Klinë, një burrë është arrestuar pasi kishte sulmuar fizikisht motrën e tij. Viktima, pas marrjes së tretmanit mjekësor, me dëshirën e saj është sistemuar në strehimore. I dyshuari është intervistuar dhe më pas është liruar në procedurë të rregullt, me vendim të prokurorit.
Ndërsa në Gjakovë, janë arrestuar dy vëllezër të cilët janë përfshirë në një përleshje mes veti. Me vendim të prokurorit, të dy janë dërguar në mbajtje.
