Presidentja e shtetit, Vjosa Osmani ka shtruar mbrëmë Darkën tradicionale të Lamës ku duke mbledhur rreth sofrës përfaqësues të jetës institucionale e shoqërore në vend.
Osmani ka thënë se toka ushqen çdo familje, është rrënja që mbanë të bashkuar çdo komb, dhe si e tillë, tha ajo në fjalimin para të pranishmëve, është dëshmia më e qartë se puna e përkushtimi sjellin begatinë dhe suksesin.
“Sonte në këtë Darkë të Lamës, festën tonë tradicioniale, ne nuk po festojmë fundin e një sezoni të punës, por po nderojmë edhe vetë filozofinë jetësore të njeriut që jeton me tokën, që e punon tokën që e gëzon ku ajo jep fryt”, tha Osmani.
Ajo tha se kjo Darkë e Lamës, nismë e presidentit Rugova, është ngjarje kulturore dhe kujtesë e lidhjes me traditën.
“Darka e Lamës, e cila është nismë e Presidentit historik të Kosovës, Dr. Ibrahim Rugova, është kujtesë e lidhjes sonë me rrënjët, me tokën që na mban e ushqen, me traditën që na mëson të jemi mirënjohës”, ka thënë Osmani.
