Gjykata Supreme ka njoftuar se e ka pranuar ankesa e kandidatit të pavarur për kryetar të Komunës së Kllokotit, Arbër Emini dhe ka prishur vendimin e Panelit Zgjedhor për Ankesa dhe Parashtresa të datës 15 tetor. Supremja thotë se çështja është kthyer në rivendosje në PZAP.
Kandidati i pavarur në Kllokot, Arbër Emini një ditë pas zgjedhjeve lokale ishte ankuar në PZAP me pretendimin se në procesin zgjedhor të 12 tetorit, Serbia ka ndërhyrë në sistemin zgjedhor në Komunën e Kllokotit, duke fabrikuar dëshmi mjekësore serbe të strukturave paralele për t’u shfrytëzuar votuesit me asistencë të përdorin këtë vërtetim mjekësor.
Gjykata Supreme e Kosovës vlerëson se PZAP, gabimisht ka vendosur kur e ka hedhur poshtë ankesën Eminit, sepse siç thonë, i njëjti është ankuar për procesin dhe parregullsitë gjatë ditës së votimit dhe jo kundër rezultateve preliminare të tabuluara nga KQZ, ashtu siç ka pretenduar PZAP në vendimin e saj.
Andaj, në rivendosje, Supremja ka udhëzuar PZAP-në që t’i evitojë shkeljet e theksuara në Aktvendimin e Gjykatës Supreme.
Panelit Zgjedhor për Ankesa dhe Parashtresa, në vendimin e 15 tetorit e kishte hedhur si të palejuar ankesën e Arbër Eminit, prandaj ai i është drejtuar Supremes “me të cilën e konteston ligjshmërinë e vendimit të PZAP-së, derisa ka propozuar që Gjykata Supreme të aprovojë ankesën si të bazuar, të konstatohet se procesi zgjedhor në Komunën e Kllokotit është cenuar në mënyrë të rëndë dhe rezultatet nuk pasqyrojnë vullnetin e vërtetë të qytetarëve, të anulohet rezultati aktual i zgjedhjeve në Komunën e Kllokotit, të urdhërohet përsëritja e zgjedhjeve në Komunën e Kllokotit nën kushte të sigurta, të lira dhe demokratike, me mbikëqyrje të shtuar dhe masa të forta kundër manipulimeve dhe të kërkohet hetim i plotë nga organet kompetente për ndërhyrjen e strukturave paralele serbe dhe shtetit të Serbisë në procesin zgjedhor”, thuhet ndër të tjera në arsyetimin e Gjykatës Supreme.
