Një person ka mbetur i lënduar si pasojë e shpërthimit të një bombole të oksigjenit në magjistralen Kaçanik – Ferizaj, konkretisht në fshatin Nikaj.
Zëdhënësi i Policisë për rajonin e Ferizajt, Kanun Veseli, ka konfirmuar për RTKlive se menjëherë janë njoftuar shërbimet emergjente, përfshirë njësinë e zjarrfikësve dhe ndihmën e shpejtë, të cilët kanë dalë në vendin e ngjarjes.
Ai tha se si pasojë e eksplodimit një person ka mbetur i lënduar dhe pas ndihmës së parë në Kaçanik, është dërguar në QKUK në Prishtinë.
“Në këtë rast një person është i lënduar, ndërsa janë shkaktuar dëme të mëdha materiale në fabrikën për mbushje të bombolave të oksigjenit. Personi i lënduar pas ndihmës së parë në Kaçanik është dërguar në QKUK-Prishtinë. Për momentin, njësitet policore dhe ekipet relevante ndodhen në vendngjarje dhe po ndërmarrin veprimet hetimore dhe të sigurisë për ndriçimin e plotë të rasti”, tha Veseli.
Ai bëri të ditur se lidhur me këtë rast, është njoftuar edhe prokurori i shtetit.
