Nga 27 deri më 31 tetor 2025, në Prishtinë dhe Prizren do të mbahet edicioni i 24-të i Festivalit Ndërkombëtar të Muzikës “ReMusica”. Edicioni i sivjetshëm do të sjellë një program të pasur me koncerte, punëtori dhe diskutime rreth ndërthurjes së muzikës tradicionale me atë bashkëkohore.
Në një lidhje të drejtpërdrejtë në RTK, udhëheqësja artistike e festivalit, Donika Rudi, tha se ky edicion do të jetë “shumë interesant dhe i larmishëm”, duke përfshirë artistë vendorë dhe ndërkombëtarë.
“Do të fillojmë të hënën, dhe si çdo vit, kemi menduar edhe për fëmijët me programin ‘ReMusica Junior’, ku do të ketë punëtori dhe koncerte të veçanta,” theksoi Rudi.
Ajo shtoi se fokusi kryesor i këtij edicioni është marrëdhënia midis muzikës tradicionale dhe asaj moderne.
“Ideja është të shohim se sa kompozitorët sot frymëzohen nga e kaluara, nga motivet tradicionale, dhe si kjo reflektohet në muzikën bashkëkohore. Kemi përfshirë edhe diskutime mbi këtë temë dhe çështje të tjera të rëndësishme për komunitetin tonë,” tha Rudi.
“ReMusica” mbetet një nga ngjarjet më të rëndësishme kulturore në Kosovë, që prej vitit 2002 promovon krijimtarinë bashkëkohore muzikore dhe ndërveprimin ndërkombëtar artistik.
