Deputeti i Lidhjes Demokratike të Kosovës, Armend Zemaj, është përfshirë sot në një incident fizik me një qytetar. Lajmin e kanë konfirmuar nga Policia e Kosovës.
Zëdhënësi i Policisë së Kosovës, Enis Pllana, ka deklaraur për RTK-në se palët e përfshira janë duke u intervistuar në polici.
“Sot rreth orës 15:00 është pranuar informata për një konflikt fizik në sheshin ‘Ibrahim Rugova’ në Prishtinë. Lidhur me incidentin, palët e përfshira janë duke u intervistuar në polici. Për detaje shtesë do t’ju njoftojmë me kohë”, ka thënë Pllana.
Lidhur me ngjarjen ka reaguar vet deputeti i LDK-së. Në një postim në Facebook, Zemaj ka thënë se gjatë një interviste publike është përballur me një situatë të pakëndshme, ku një qytetar e ka ofenduar dhe provokuar verbalisht.
“Sot gjatë një interviste publike ndodhi një situatë e pakëndshme, për të cilën ndjej keqardhje të sinqertë. Një qytetar, nuk e di a ishte e rastit apo me qëllim të caktuar, këtë do e vërtetojë policia, më ofendoi dhe më provokoi verbalisht me fjalë të papranueshme, para medias dhe gazetarit që ishim në intervistë. Në atë moment reagova në mënyrë të vetëmbrojtjes në afekt, gjë e cila nuk përfaqëson as bindjet e mia personale, as parimet që unë përfaqësoj si deputet dhe si anëtar i Lidhjes Demokratike të Kosovës”, ka shkruar Zemaj.
Ai ka shtuar se në raste të tilla duhet të ruhet qetësia dhe dinjiteti, duke theksuar se dhuna nuk është përgjigje e drejtë.
“Pavarësisht provokimit, dhuna, në çfarëdo forme, nuk është përgjigje e drejtë. Për këtë veprim, shpreh keqardhje dhe kërkoj falje publike. Kam respekt të plotë për çdo person, për çdo mendim dhe çdo kritikë, pavarësisht se sa e ashpër mund të jetë ajo”, ka shkruar më tej Zemaj.
