Gjykata Kushtetuese e Republikës së Kosovës ka publikuar aktgjykimin në rastin KI33/24, të parashtruar nga Agron Bakalli, në të cilin është kërkuar vlerësimi i kushtetutshmërisë së kohëzgjatjes së procedurave gjyqësore në lëndën C.nr.19/04.
Gjykata, njëzëri, e shpalli kërkesën të pranueshme dhe konstatoi shkelje të nenit 31 (E Drejta për Gjykim të Drejtë dhe të Paanshëm) të Kushtetutës, në lidhje me nenin 6 të Konventës Evropiane për të Drejtat e Njeriut, për shkak të zgjatjes së tepruar të procedurës gjyqësore, thuhet në njoftimin e zyrës për informim të Ghykatës Kushtetuese.
Bëhet e ditur se rasti kishte të bënte me një kontest pune të nisur në vitin 1993, pas largimit të parashtruesit nga ndërmarrja “Gorenje – Elektromotori” sh.a., ndërsa procedura në Gjykatën Komunale në Gjakovë kishte mbetur pa përfunduar për mbi 14 vjet (2009–2023).
Gjykata Kushtetuese vlerësoi se vonesat e gjata dhe mungesa e veprimeve nga gjykatat përbëjnë shkelje të së drejtës për gjykim brenda një afati të arsyeshëm dhe kërkoi nga gjykatat e rregullta që ta përmbyllin çështjen me prioritet dhe dinamizëm të shtuar.
