Gjykata Supreme e Kosovës njofton se e ka refuzuar si të pathemeltë ankesën e paraqitur nga subjekti politik Lëvizja Vetëvendosje (LVV), dega në Han të Elezit, kundër vendimit të Panelit Zgjedhor për Ankesa dhe Parashtresa (PZAP), me numër ZL.Anr.221/2025, të datës 17 tetor 2025.
PZAP më herët kishte hedhur poshtë si të pasafatshme ankesën e Lëvizjes Vetëvendosje, e cila kishte pretenduar parregullsi gjatë procesit të votimit në Han të Elezit. Pas këtij vendimi, LVV kishte paraqitur ankesë në Gjykatën Supreme, duke kërkuar që të urdhërohet hetimi i librave origjinalë të votimit për këtë komunë dhe të konstatohet se numri i lartë i rasteve të asistimit përbën shkelje të nenit 10 të Rregullores 12/2024, si dhe të parimit të fshehtësisë së votës. Gjithashtu, LVV kishte kërkuar përsëritjen e votimit në vendvotimet ku shkeljet e pretenduara ishin të verifikueshme dhe ndikonin në rezultatin përfundimtar, thuhet në njoftimin e zyrës për informim të kësaj gjykate.
Bëhet e ditur se pas shqyrtimit të ankesës, Gjykata Supreme konstatoi se vendimi i PZAP-it ishte në përputhje me ligjin dhe se ankesa e Lëvizjes Vetëvendosje është e pathemeltë.
Në arsyetimin e saj, Gjykata theksoi se shqyrtimi në meritë i një ankese që është e pasafatshme do të cenonte sigurinë juridike dhe do të zvarriste ciklin e procesit zgjedhor, prandaj kërkesa e subjektit politik u refuzua si e pathemeltë.
