Gjykata Supreme e Kosovës, njofton se ka refuzuar si të pabazuar ankesën e kandidatit të pavarur për kryetar të Komunës së Hanit të Elezit, Rufki Suma, kundër vendimit të Panelit Zgjedhor për Ankesa dhe Parashtresa (PZAP).
Suma kishte paraqitur ankesë në Gjykatën Supreme pas vendimit të PZAP-it të datës 20 tetor 2025, me të cilin ishte refuzuar kërkesa e tij ndaj Partisë Demokratike të Kosovës (PDK) dhe Komisionit Qendror të Zgjedhjeve (KQZ), për parregullsi të pretenduara gjatë zgjedhjeve lokale të mbajtura më 12 tetor 2025, njofton kjo Gjykatë.
Në ankesën e tij, ai kishte kërkuar që Gjykata të urdhërojë verifikimin e librave origjinalë të votimit për Komunën e Hanit të Elezit dhe të konstatojë se votimi i personave të burgosur përbën shkelje të nenit 45, paragrafi 2 të Kushtetutës së Kosovës, si dhe të nenit 6, paragrafi 2 të Ligjit për Zgjedhjet, duke theksuar se kjo përbën edhe vepër penale sipas nenit 213 të Kodit Penal të Kosovës.
Bëhet e ditur se pas shqyrtimit të pretendimeve ankimore, përgjigjeve dhe shkresave të lëndës, Gjykata Supreme vlerësoi se vendimi i PZAP-it ishte marrë në përputhje me ligjin dhe se nuk ishte bërë ndonjë shkelje në dëm të parashtruesit të ankesës.
Në arsyetimin e saj, Gjykata theksoi se gjendja faktike është vërtetuar drejt dhe se nuk ekzistojnë bazat ligjore për pranimin e ankesës, prandaj ajo u refuzua si e pabazuar.
