Teatri Kombëtar i Kosovës, një nga institucionet më të rëndësishme kulturore në vend, po i nënshtrohet një restaurimi të thellë që synon ta shndërrojë atë në një hapësirë moderne të artit skenik. Ndërtesa, e ndërtuar menjëherë pas Luftës së Dytë Botërore, është mbyllur që nga viti 2022 për shkak të gjendjes së rëndë infrastrukturore dhe mungesës së kushteve teknike. Ndërsa aktorët përformojnë me shumë vështirësi në teatrin e Pallatit të Rinisë.
Kushtrim Sheremeti, drejtor i TKK tha se “Kemi informata prej vizitave tona në terren. Ne jemi monitorues pasiv të objektit tonë. Realisht vazhdojnë demolimet edhe krejt çka kemi pa është një rrënojë mbrenda, normal që duhet me qenë e rrënume para se me u ndërtu por, ende s’kemi fillu me pa vendosje të atyre që i kemi punu në projektin bashkë me arkitektët”.
Në mungesë të sallës kryesore, aktivitetet teatrore janë zhvendosur në ambiente të përkohshme, ndërsa trupa artistike përballet me vështirësi të vazhdueshme.
“Në hapësirën që jemi duke punuar tash e tre vjet është hapësirë e cila nuk i plotëson as kriteret e as kushtet minimale”, pohoi Adrian Morina, aktor i TKK.
Megjithëkëtë restaurimi i Tetarit Kombëtar, pritet që të jetë një vend ku gjeneratat e reja të artit skenik do të kenë mundësi të realizojnë idetë e tyre dhe veprat që do të tërheqin artdashës edhe përtej kufijve.
Ministria e Kulturës ka ndarë mbi 6.9 milionë euro për këtë ndërhyrje, e cila përfshin ruajtjen e fasadës historike dhe ndërtimin e hapësirave moderne për artistët dhe publikun. Me projektin, që ende është larg përfundimit, arti skenik në Kosovë mbetet në pritje të kthimit në shtëpinë e tij historike.
