Procesi i miratimit të buxheteve komunale në Kosovë nuk ka përfunduar ende. Sipas Asociacionit të Komunave të Kosovës, 11 komuna nuk e kanë miratuar buxhetin për vitin fiskal të ardhshëm, gjë që mund të krijojë probleme në zbatimin e projekteve dhe financimin e tyre gjatë vitit të ardhshëm. Kryetari i Komunës së Suharekës, Bali Muharremi, tha se opozita në Kuvendin Komunal nuk e ka miratuar buxhetin për komunën e tyre.
Procesi i miratimit të buxheteve komunale për vitin fiskal ende nuk është finalizuar në të gjithë territorin e vendit. Drejtori Ekzekutiv i Asociacionit të Komunave të Kosovës, Sazan Ibrahimi, tha për Radio Kosovën se disa komuna janë ende në pritje të miratimit të buxheteve të tyre.
“Këto komuna janë Viti, Lipjan, Vushtrri, Malishevë, Shtime, Junik, Zubin Potok, Gjilan, Prizren, Prishtinë dhe Suharekë. Janë ende pa buxhet të miratuar”, tha Ibrahimi.
Ai shtoi se komunat do të duhej t’i përfundonin procedurat para se buxheti i Republikës së Kosovës të procedohej në Kuvend, në mënyrë që dokumentet buxhetore komunale të dërgohen në nivel qendror për miratim.
Sipas tij, situata aktuale është ndikuar nga rrethanat politike dhe procesi zgjedhor në vend.
Kryetari i Komunës së Suharekës, Bali Muharremi, i tha Radios së Kosovës përmes një përgjigjeje me email se buxheti për vitin fiskal nuk është miratuar nga Asambleja Komunale, konkretisht nga opozita.
“Natyrisht, ne do të ndjekim procedurat sipas ligjit, por siç duket, duhet të presim konstituimin e asamblesë së re nga zgjedhjet e fundit, për të vazhduar më pas me procedurat për miratimin e buxhetit”, tha Muharremi.
Ndërkaq, Ibrahimi paralajmëroi se nëse buxhetet komunale nuk miratohen para buxhetit të shtetit, komunat do të përballen me financim të përkohshëm dhe me kufizime serioze në investime.
“Tani mbetet në duar të kuvendeve komunale, por gjithashtu edhe të Kuvendit të Republikës së Kosovës, që t’i marrë parasysh buxhetet komunale që miratohen me vonesë. Nëse miratohet buxheti i Republikës pa buxhetet e disa komunave, atëherë vitin e ardhshëm këto komuna do të financohen me 1/12 e buxhetit të këtij viti. Kjo do të thotë se nuk do të kenë mjete për investime të reja kapitale dhe as për bartjen e të hyrave vetanake”, paralajmëroi Ibrahimi.
Ai shtoi se Asociacioni i Komunave kishte kërkuar nga Ministria e Financave që t’u mundësojë komunave shtyrjen e afatit për miratimin e buxheteve pas zgjedhjeve lokale, por kjo kërkesë, sipas Ibrahimit, nuk mori përgjigje.
Radio Kosova ka kontaktuar edhe Komunën e Prishtinës për këtë çështje, por deri në publikimin e këtij raporti nuk ka marrë përgjigje.
