Komisioni Qendror i Zgjedhjeve i ka bërë publike rezultatet përfundimtare të zgjedhjeve të 12 tetorit për 35 komuna të vendit. Kryetari i KQZ-së Kreshnik Radoniqi, ka bërë të ditur se për shkak të disa ankesave të cilat janë duke u shqyrtuar nga PZAP, Prishtina, Juniku dhe Mamusha nuk i kanë të përfunduara procedurat për të publikuar rezultatet përfundimtare.
“Komisioni Qendror i Zgjedhjeve ka komunikuar me PZAP-në dhe nga ky institucion kemi marrë konfirmim se nuk ka ankesa aktive lidhur me zgjedhjet për kryetarë komunash për shumicën e komunave, përveç Komunës së Prishtinës, Junikut dhe Mamushës. Këto ankesa janë në trajtim e sipër, andaj KQZ-ja sot do të bëjë shpalljen e rezultateve të zgjedhjeve për 35 komunat e tjera, ndërsa për tri komunat e mbetura shpallja e rezultateve përfundimtare do të bëhet në vijim, pasi të konsumohen të gjitha mundësitë për paraqitjen e ankesave edhe në Gjykatën Supreme,” ka thënë Radoniqi.
Sipas të dhënave të KQZ-së, 15 komuna do të shkojnë në balotazh më 9 nëntor, përfshirë: Prizrenin, Gjakovën, Gjilanin, Dragashin, Kaçanikun, Klinën, Fushë Kosovën, Mitrovicën e Jugut, Obiliqin, Rahovecin, Pejën, Suharekën, Vitinë, Vushtrrinë dhe Kllokotin.
Ndërsa disa parti kanë siguruar fitore në raundin e parë pa nevojën e balotazhit.
Në Deçan ka fituar Bashkim Ramosaj nga Aleanca për Ardhmërinë e Kosovës. Në Ferizaj, fitues është Agim Aliu nga Partia Demokratike e Kosovës (PDK), ndërsa në Lipjan ka fituar Imri Ahmeti nga Lidhja Demokratike e Kosovës (LDK).
Shpejtim Bulliqi nga Lëvizja Vetëvendosje është shpallur fitues në Podujevë, Sami Lushtaku nga PDK në Skenderaj, Kadri Rahimaj nga Lëvizja Vetëvendosje në Kamenicë dhe Ilir Ferati nga LDK në Istog.
Në Shtimë ka fituar Qemajl Aliu nga Lëvizja Vetëvendosje, ndërsa Malishevën e ka fituar Ekrem Kastrati nga Nisma. Ramiz Lladrovci është shpallur fitues në Drenas, ndërsa Mehmet Ballazi nga PDK në Hani i Elezit.
Lista Serbe ka fituar në 9 komuna: Novobërdë, Shtërpcë, Zubin Potok, Zveçan, Ranillug, Partesh, Mitrovicë e Veriut, Leposaviq dhe Graçanicë.
Gjatë mbledhjes, anëtarët e VV-së në KQZ, Sami Kurteshi dhe Alban Krasniqi, kanë votuar kundër shpalljes së rezultateve për disa komuna, duke shprehur ankesa lidhur me votimin e asistuar në Kaçanik, Malishevë, Mamushë, Hani i Elezit, Zubin-Potok, Graçanicë, Ranillug, Kllokot, Partesh, Mitrovicë e Veriut, Leposaviq, Novobërdë dhe Zveçan.
Afati për paraqitjen e ankesave për këto komuna është dy ditë.
Rezultatet e publikuara mund t’i shihni KËTU.
