Huthët jemenas liruan modelen dhe aktoren Entisara al-Hammadij (25) pasi kaloi pothuajse pesë vjet në paraburgim me akuza për sjellje të pahijshme.
Ky informacion u konfirmua nga avokati i saj Khaled al-Kamal. Hammadi u arrestua në shkurt të vitit 2021 në Sanaa, ndërsa po shkonte për një set fotografik.
Ajo u dënua më vonë me pesë vjet burg për akuzat e prostitucionit, përdorimit të drogës dhe kurvërisë, akuza të përshkruara nga avokati i saj dhe organizatat e të drejtave të njeriut si të sajuara dhe që synonin të shtypnin liritë e grave.
Avokati i saj, Khaled al-Kamal, tha se Hammadi u lirua nga burgu qendror në kryeqytetin Sana’a të shtunën. Ai shtoi se ajo vuante nga sëmundje të ndryshme dhe se shëndeti i saj u përkeqësua gjatë qëndrimit në burg.
Përpara arrestimit të saj, Hammadi ndau shumë foto në internet me veshje tradicionale jemenase dhe moderne, me dhe pa hixhab. Ajo punoi si modele për katër vjet dhe u shfaq në dy seriale televizive jemenase në vitin 2020. Ajo kishte mijëra ndjekës në Instagram dhe Facebook.
Amnesty International tha se pas arrestimit të saj, Hammadi u “mor në pyetje me sy të lidhur, u abuzua fizikisht dhe verbalisht, iu nënshtrua fyerjeve raciste dhe u detyrua të ‘rrëfejë’ disa krime – duke përfshirë posedimin e drogës dhe prostitucionin”.
Sipas HRW, palët ndërluftuese në Jemen – përfshirë Huthitët, qeverinë e njohur ndërkombëtarisht dhe Këshillin Kalimtar Jugor – kanë kufizuar të drejtat e grave në zonat nën kontrollin e tyre.
Në një raport të marsit 2024, grupi tha se grave u ndalohej të udhëtonin midis provincave dhe, në disa raste, të largoheshin nga vendi pa lejen e një kujdestari mashkull ose të shoqëruara nga një i afërm i ngushtë mashkull.
Këto politika kanë ndikuar seriozisht në aksesin e grave në punë, arsim, kujdes shëndetësor dhe në aftësinë e tyre për të vizituar anëtarët e familjes.
