Komuna e Malishevës ka njoftuar se sot, në Dragobil u përkujtua dëshmori i kombit, Ali Murat Paçarizi, në 27-vjetorin e rënies së tij për lirinë e Kosovës.
Sipas njoftimit, të pranishëm ishin kryetari i Komunës së Malishevës, Ekrem Kastrati, kryetari i degës së OVL-UÇK-së në Malishevë, Metush Kryeziu, kryetari i nëndegës së OVL të UÇK-së në Dragobil, Habib Paçarizi, bashkëluftëtarë, familjarë dhe qytetarë të shumtë.
“Në fjalimet e mbajtura pranë lapidarit të dëshmorëve u theksua se Aliu, në moshë fare të re, zgjodhi pushkën për t’i dalë zot lirisë dhe dinjitetit kombëtar. “Jeta dhe gjaku i dëshmorëve janë themel i shtetit që ne sot e gëzojmë,” u tha mes tjerash gjatë ceremonisë. Në fjalimet e tyre, ata dhanë një mesazh të qartë se amaneti i tyre do të ruhet përjetë”, thuhet në njoftim.
U përkujtuar edhe plagosja e luftëtarëve Arsim dhe Haki Paçarizi, të cilët atë ditë të 27 tetorit 1998, ishin bashkë me Aliun, tanimë dëshmorë.
Pas përkujtimit, pjesëmarrësit bënë homazhe dhe vendosën buqeta lulesh në varrezat e dëshmorëve në Malishevë.
