Policia e Kosovës ka arrestuar një person të dyshuar pas të shtënave me armë zjarri që ka ndodhur në fshatin Gllogjan të Deçanit.
Sipas njoftimit të Drejtorisë Rajonale të Policisë në Pejë, pas pranimit të informatës për të shtëna me armë në këtë zonë, njësitë policore të Stacionit Policor në Deçan, kanë dalë menjëherë në vendin e ngjarjes, ku janë gjetur disa prova që lidhen me rastin.
Pas një pune hetimore intensive, sot hetuesit e Stacionit Policor në Deçan kanë arritur ta identifikojnë dhe arrestojnë të dyshuarin. Gjatë kontrollit te i njëjti janë gjetur dhe sekuestruar: Një armë pistoletë e llojit Pietro Beretta, kalibër 9 mm dhe një karikator i së njëjtës armë.
Policia bën të ditur se pas intervistimit nga hetuesit, me urdhër të prokurorit të shtetit, i dyshuari është dërguar në mbajtje për 48 orë, ndërsa hetimet lidhur me rastin po vazhdojnë.
