Prania e azbestit në rreth 230 mijë metra katrorë dhe rreth 70 kilometra gypa ujësjellësi, mbesin shqetësim për qytetarët e Prishtinës. Ndërkohë, ekspertë të shëndetit, ka kohë që paralajmërojnë se ky material rrezikon seriozisht shëndetin e qytetarëve. Komuna përgjatë viteve ka hapur dhe rihapur tenderë, pasi kompanitë nuk e plotësojnë kushtin për të pasur deponi për groposje të këtij materiali kancerogjen.
Rreth 230 mijë metra katrorë vlerësohet se janë të mbuluara me azbest në zonën urbane të kryeqytetit. Krahas kësaj, azbesti është i pranishëm në rreth 70 kilometra gypa ujësjellësi.
Prishtina përtej materialeve të kontaminuara, mbetet ende premtim që përfundon në heshtje, ndërkohë që ekspertë të shëndetit kanë paralajmëruar se ky material rrezikon shëndetin e qytetarëve.
“Nëse këta janë të rrezikshme, atëherë sa më parë të hiqet.Sa ma parë duhet të nderrohen me dicka tjetër. Të zevendesohen me dicka se po thonë që janë të rrezikshme”, tha një qytetar.
“Unë sa e di, krejt kanë thanë në Ulpianë me heq po s’po i heqin”, shtoi një qytetar tjetër.
Nga këndvështrimi i një pulmologu, azbesti është njëri nga shkaktarët e sëmundjes së mushkërive.
Komuna e Prishtinës, mos-heqjen e azbestit e arsyeton se deri më tani asnjë kompani konkurruese për tenderin e hapur nuk i ka plotësuar kushtet e parapara. Pos largimit, një nga kushtet tejet e rëndësishme është edhe caktimi i një deponie adekuate për materialet e dëmshme, e ku do të groposej azbesti, ndërsa komuna ka kërkuar që lokacioni i deponisë të jetë i kompanive.
”Në vitin 2024, Komuna e Prishtinës, e ka përfunduar projektin e inventarizimit komplet të hapësirës me azbest, pas kësaj faze edhe ka lansuar projektin për me largu azbestin. Realisht këtë vit e kemi pasur një tender, i cili ka përfshi një pjesë të hapësirës me azbest edhe largimin e saj, nuk ka kaluar ai tender për arsye se njëra nga kërkesat ka qenë deponia e atyre materialeve të dëmshme, varrosja e pjesës së azbestit, pasi që kompanitë nuk e kanë pasur, atëherë është kërkuar që tenderi të dalë edhe një herë ose në të ardhmen nëse asnjë prej kompanive nuk e ka atëherë duhet me kërkuar ndihmë prej nivelit me gjetur një hapësirë me i groposë materialet e dëmshme”, tha Pëllumb Bajçinovci, zëdhënës i Komunës së Prishtinës.
Komuna e Prishtinës pritet të hapë tender të ri, megjithëkëtë, sipas zyrtarëve komunalë, nëse asnjë kompani nuk e ka deponinë e vet, do të kërkohen zgjidhje të tjera për gjetjen e hapësirës.
