Buxheti i Republikës për vitin 2026 e Plani i Rritjes do të jenë thirrjet për kompromis që presidentja e shtetit, Vjosa Osmani pritet t’iu adresojë liderëve politikë kur t’i nis konsultat, pas dështimit të Albin Kurtit si mandatar i parë që t’i siguronte votat e mjaftueshme për krijimin e qeverisë së re të dielën që shkoi.
Këtë e ka konfirmuar këshilltari për media i presidentes Osmani, Bekim Kupina.
“Presidentja Osmani, në konsultat që do t’i zhvillojë me partitë politike, do ta potencojë rëndësinë e miratimit të Buxhetit për vitin 2026 si dhe miratimin e Planit të Rritjes, si akte të domosdoshme për stabilitetin institucional dhe funksionimin normal të shtetit si dhe për zhvillimin ekonomik të vendit tonë”, ka thënë Kupina.
Sipas tij, presidentja do të bëjë thirrje për një kompromis politik, nëpërmjet të cilit do të garantohet interesi i Kosovës dhe i qytetarëve të saj, si dhe të sigurohet rruga përpara për avancimin e vendit.
“Në këtë kuadër, Presidentja do t’i inkurajojë partitë politike të bashkëpunojnë për ta shmangur çdo bllokadë që mund të ndikojë negativisht në mirëqenien e qytetarëve dhe në funksionimin e institucioneve të Republikës së Kosovës”, ka thënë Kupina, këshilltar i presidentes Osmani.
Aktualisht, Osmani gjendet në një vizitë zyrtare në Arabinë Saudite, dhe konsultat me partitë pritet t’i nis me t’u kthyer nga atje.
Partitë e deritashme opozitare, të dielën kur dështoi zgjedhja e qeverisë së re shfaqen gatishmërinë e shkuarjes në zgjedhje të parakohshme.
Një ditë më parë lideri i Vetëvendosjes, kryeministri në detyrë, Albin Kurti në një konferencë për media tha se është për të ardhur keq që përveç balotazhit të 9 nëntorit do të ketë edhe dy herë zgjedhje, sipas tij, në dimër e në pranverë, kur tha se radha do t’i vije zgjedhjes së presidentit apo presidentes të re të vendit, e që bazuar në situatën aktuale, tha se do të jetë e vështirë të krijohen 80 votat e nevojshme për ta zgjedhur kreun e shtetit.
