Kryetari i Kuvendit të Kosovës, Dimal Basha, pas takimit me përfaqësuesve të Bordit aktual të Transmetuesit Publik dhe kryesinë e Sindikatës së Punëtorëve të RTK-së (SPERTK) ka shprehur të domosdoshme formimin e trupave të Kuvendit për të mundësuar funksionimin e transmetuesit publik.
“Gjatë takimeve është diskutuar gjerësisht për gjendjen financiare të Radio Televizionit të Kosovës, sfidat me të cilat po përballen punëtorët dhe pasojat që ka shkaktuar vonesa në ekzekutimet buxhetore për transmetuesin publik”, ka njoftuar Basha.
Sipas njoftimit nga Kuvendi, Basha ka shprehur mbështetjen e plotë për përfaqësuesit e punëtorëve dhe anëtarët e Bordit, duke theksuar domosdoshmërinë e veprimit të shpejtë institucional.
“Marrë parasysh gjendjen e jashtëzakonshme në të cilën ndodhet RTK-ja dhe faktin që Kuvendi është themelues i saj, është e domosdoshme që me urgjencë të vazhdojmë me formimin e trupave punuese të Kuvendit, në mënyrë që RTK-së t’i mundësohet operimi financiar për misionin e saj në shërbim të pandërprerë ndaj publikut”, deklaroi Basha.
