Guvernatori i shtetit veriperëndimor meksikan të Sinaloas, i cili është tronditur nga konflikti midis karteleve të drogës, tha se qyteti i lindjes i bosit meksikan të drogës Joaquin “El Chapo” Guzman, i cili aktualisht është në burg, ishte shënjestra e një sulmi me dron dje.
Bombardimi goditi Badiraguaton, shtëpinë stërgjyshore të familjes së El Chapos dhe një fortesë historike e trafikut të drogës në Meksikë, dhe detyroi dhjetëra banorë të largoheshin nga zona, shpjegoi Guvernatori Rubén Rocha Moya.
“Dronët u përdorën me të vërtetë në këto sulme”, konfirmoi guvernatori për gazetarët, duke i siguruar ata se qeveria po kujdesej për të zhvendosurit.
Sulme në fermën e El Chapos
Sulmet kishin në shënjestër fermën La Tuna, e cila i përket familjes së El Chapo-s, dhe sipas dëshmitarëve, edhe prona të tjera u vunë në shënjestër, me më shumë se 80 familje të kërcënuara nga grupe të armatosura. Sulmet me dronë filluan më 16 shtator, sipas një banoreje të Bacacoragua, një nga komunat e Badiragua-s, e cila iku nga fshati i saj në fillim të tetorit.
Burra të armatosur bllokuan hyrjen në ferma dhe ndërprenë energjinë elektrike në zonë, tha një dëshmitar tjetër, i cili gjithashtu iku nga një fshat në rajon.
Një konflikt i dhunshëm ka vënë përballë njëra-tjetrës fraksione të ndryshme të kartelit Sinaloa që nga shtatori i vitit 2024, në të cilin janë vrarë të paktën 1,700 njerëz, përfshirë 57 minatorë, dhe gati 2,000 të tjerë rezultojnë të zhdukur.
Në Meksikë, grupe të ndryshme kriminale përdorin dronë për të kryer sulme ndaj rivalëve të tyre ose ndaj autoriteteve, me kartelin Jalisco Nueva Generación (CJNG) që ishte i pari që filloi të përdorte këto pajisje në vitin 2020.
