Kampionia e Kosovës në basketboll, Trepça, ka vazhduar serinë e humbjeve në FIBA Europe Cup, duke u mposhtur të mërkurën mbrëma në palestrën “Minatori” në Mitrovicë nga skuadra polake Anwil Wloclawek me rezultat 97:87.
Polakët kanë dominuar që nga fillimi i ndeshjes, duke fituar çerekun e parë 32:23, ndërsa Trepça ka reaguar në çerekun e dytë, që përfundoi 18:12 në të mirë të tyre.
Megjithatë, periudha vendimtare e tretë është mbyllur 27:16 për mysafirët, që ka vulosur epërsinë e Anwilit. Dhjetëminutëshi i fundit ka përfunduar 30:26 në të mirë të Trepçës, por kjo nuk ka mjaftuar për të shmangur humbjen.
Mustapha Amzil dhe Jacori Payne kanë qenë më të dalluarit te Trepça, secili me shtatëmbëdhjetë pikë. Amzil ka kontribuar edhe me pesë kërcime dhe një asistim, ndërsa Payne ka shtuar katër kërcime dhe dy asistime.
Kjo humbje vjen pas dy disfatesh të mëparshme të Trepçës në FIBA Europe Cup: 85:74 nga PAOK dhe 84:70 nga Braunschweig. Me këtë rezultat, Trepça mbetet në vendin e fundit në Grupin F, ndërsa Braunschweig kryeson me tri fitore nga tri ndeshje, dhe PAOK ka dy fitore e një humbje. Ndeshja e radhës për mitrovicasit do të zhvillohet më 5 nëntor kundër PAOK.
