Pas mbledhjes së Kryesisë së Kuvendit, kryetari i Kuvendit të Kosovës, Dimal Basha, tha se qëllimi i mbledhjes ka qenë hapja e diskutimeve për tri çështje kryesore dhe disa pika të tjera të rendit të ditës. Ai theksoi se arsyeja e vetme e thirrjes së kësaj mbledhjeje ishte se vendi ndodhet në rrethana të jashtëzakonshme.
Ai ka thënë se nuk gjeti vullnet politik te partitë politike sa iu përket këtyre çështjeve. I pari i Kuvendit shtoi se kishte paraparë që të premten, më 31 tetor, të thërrasë seancë të jashtëzakonshme.
“Fillimisht ju njoftoj se arsyeja e vetme ka qenë se jemi në rrethana të jashtëzakonshme. Çështja e parë ka qenë ajo e buxhetit të RTK-së. Kam takuar Sindikatën dhe Bordin, ndërkohë që drejtorit i skadon mandati të premten, e RTK-ja aktualisht është pa buxhet. Pas diskutimeve që kam zhvilluar me ta, si kryetar i Kuvendit kam dhënë mbështetjen time për ta gjetur mënyrën e vetme për të ecur përpara. Ne si Kryesi themelojmë grupet parlamentare dhe bëjmë ndarjen e komisioneve parlamentare, të cilat i votojmë në një seancë. Pastaj kam kërkuar që të votohet raporti i RTK-së në Komisionin për Buxhet dhe Financa, në mënyrë që të mundësohet ekzekutimi i buxhetit për RTK-në që duhet të ndodhë brenda ditës”, tha Basha.
“Kam paramenduar se do të gjej mirëkuptim sot te anëtarët e Kryesisë, rrjedhimisht kam dashur të bëj kërkesë për seancë të jashtëzakonshme nesër në mëngjes për ta përfunduar themelimin e komisioneve e që kanë mundur menjëherë pas seancës ta votojnë raportin e RTK-së, që RTK-ja ta ketë buxhetin dhe drejtori ka pasur mandat për ekzekutimin e pagave”, tha ai.
