Nga Rasim Smajlaj
Të nderuar qytetarë të Dukagjinit. Më 9 nëntor, ne përsëri do ta kemi në dorë vendimin për të ardhmen e komunave tona. Ky është momenti kur secili prej nesh duhet të mendojë me zemër për qytetin, por edhe me mendje për të ardhmen e fëmijëve tanë.
Si shumë prej jush, edhe unë kam ndjekur me kujdes fushatat, debatet dhe punët që janë bërë gjatë viteve. Sot, dua të ndaj qëndrimin tim të sinqertë për balotazhin që po vjen — jo si politikan, por si qytetar që do të shohë komunat tona duke ecur përpara.
Nisma Socialdemokrate ka qenë dhe mbetet forcë që punon për qytetarin, jo për karrigen. Ne nuk kemi pasur ndonjëherë frikë të themi atë që është e drejtë, edhe kur s’na ka leverdisur politikisht. Prandaj, tani që jemi në balotazh, është momenti të mendojmë për të mirën e përbashkët.
Duke parë programet, qëndrimet dhe punën e kandidatëve në këto komuna, qëndrimi im është i qartë:
Në Pejë dhe në Junik, le të mbështesim kandidatët e LDK-së. Ata kanë treguar përvojë, maturi dhe gatishmëri për bashkëpunim. Ne kemi nevojë për njerëz që dinë të dëgjojnë dhe të punojnë për qytetarin, jo për kamerat.
Në Gjakovë, e them hapur: të votojmë Ardian Gjinin. Gjakova ka parë ndryshime të prekshme nën udhëheqjen e tij. Ai nuk flet shumë, por punon shumë. Qyteti është pastruar, zhvilluar dhe ka rifituar dinjitetin që meriton. Ai ka dëshmuar se me punë dhe përkushtim mund të bëhen gjëra të mëdha.
Në fund, dua t’ju ftoj të gjithëve – simpatizantë, anëtarë e miq të Nismës Socialdemokrate – që të votoni me zemër e ndërgjegje. Të mos shikojmë ngjyrën e partisë, por të shikojmë kush është më afër qytetarit dhe kush ka bërë më shumë për njerëzit e këtij vendi.
Zgjedhjet kalojnë, por puna dhe nderi mbesin.
Të votojmë për njerëzit që punojnë, jo për ata që vetëm premtojnë.
Të votojmë për të ardhmen tonë.
