as takimit të lidereve politikë me presidenten e Republikës së Kosovës, Vjosa Osmani, kryetari i LDK-së, Lumir Abdixhiku, ka deklaruar se në rrethanat aktuale politike nuk ekziston shumicë parlamentare dhe kjo sipas tij e bën të domosdoshme organizimin e zgjedhjeve të reja.
“Në konstilacionin e tanishëm politik nuk ka shumicë parlamentare, rrjedhimisht afatet kushtetuese na detyrojnë fatkeqësisht në zgjedhjet e reja. Ironikisht shumë më shpesh u përmend në këtë takim qeveria e unitetit dhe qeveria e tranzicionit si mundësi për të kaluar disa çështje urgjente. Ju kujtoj se para disa kohe kur LDK e kishte propozuar këtë ide ishte përqeshur edhe në përmbajtje edhe në titull, edhe në emërim. Tani kërkohet një fazë kalimtare për krizë, por është e pamundur. Sa më parë që organizojmë zgjedhjet i shmangim krizat eventuale që vijnë në potencialisht në Republikën e Kosovës”, ka theksuar Abdixhiku.
Ai tha se qeveria e unitetit u kërkua nga të gjithë ngapak.
“Flitej për unitet, për tranzicion, për zgjidhje të krizës, flitej për kalimin e çështjeve që ne i kishim paraqitur në atë 15 pikësh”, ka shtuar ai.
Abdixhiku tha se gjatë takimit u diskutua edhe për çështjen e buxhetit, duke theksuar nevojën për një fazë kalimtare që të mund të trajtohen çështjet urgjente ligjore, por pozicioni i LDK-së sipas tij mbetet i qartë. “Sa më shpejt të caktohen zgjedhjet, aq më shpejt mund të formohet qeveria e re dhe të miratohet buxheti”.
Sipas kreut të LDK-së, në këtë takim u bë e qartë edhe njëherë nga përfaqësuesit e partive politike se nuk ka shumicë parlamentare.
“Rrjedhimisht tani i takon presidentes deri të mërkurën të përcaktoj a ka shumicë apo nuk ka shumicë. Pat edhe pretendime nga kryetari i LVV-së se ndoshta duhet provuar edhe një herë, por shumica e partive politike që e përbëjnë shumicën shqiptare ishin të qartë se nuk ka shumicë”, ka nënvizuar Abdixhiku.
Ai tha se në këtë takim nuk folën për data e për marrëveshje politike. “Këtu ishim për të dhënë qëndrimet e partive politike dhe presidentja të vlerësoi nëse ka gjasa matematikore për një shumicë. U diskutua për planin e rritjes dhe trajtimin e një faze kalimtare të buxhetit, jo këtë programin elektoral që e prezantuan sot. Pra, u fol për një mundësi të vazhdimit të buxhetit të vjetër, meqenëse kemi një krizë ligjore, por qëndrimi ynë është i qartë sa më herët që i caktojmë zgjedhjet më shpejt bëhet qeveria dhe qeveria e re më shpejt e bën buxhetin”, ka përfunduar Abdixhiku.
