Kryetari i Prishtinës, Përparim Rama, ka vizituar punimet në sallën ku po finalizohen punimet e edicionit të tretë të Festivalit të Këngës në RTK.
Drejtori i Festivalit, Rilind Gërvalla, e falënderoi kryetarin Rama për mbështetjen e madhe institucionale, duke theksuar se pa përkrahjen e Komunës së Prishtinës, realizimi i festivalit nuk do të ishte i mundur.
Ndërsa kryetari Përparim Rama tha se ky është viti i tretë i bashkëpunimit me RTK-në dhe se është vendosur që festivali të mbahet në këtë sallë, e cila ofron mundësi për ndërtimin e skenografive të veçanta dhe kreative.
“Falënderoj drejtuesit e RTK-së, si dhe Pallatin e Rinisë dhe Ndërmarrjen Publike Banesore që kanë bërë të mundur që kjo hapësirë e mrekullueshme të jetë pjesë e festivalit. Ky është një bashkëpunim që po e kthen artin dhe muzikën në qendër të kryeqytetit”, u shpreh Rama.
Ai shtoi se beson që në edicionin e katërt festivali do të zgjerohet edhe më shumë, duke e cilësuar këtë ngjarje si një përvojë të jashtëzakonshme shpirtërore dhe artistike.
“Jam mirënjohës për bashkëpunimin e sinqertë dhe mezi pres të jem pjesë e kësaj eksperience të thellë shpirtërore”, përfundoi ai.
RTK, pavarësisht sfidave financiare, këtë vit po e realizon me sukses edicionin e tretë të Festivalit të Këngës, duke shënuar një interesim të madh për pjesëmarrje si nga artistët, ashtu edhe nga publiku i gjerë në Kosovë dhe jashtë saj.
Festivali i Këngës do të mbahet më 6, 7 dhe 8 nëntor.
