Gjatë `Konferencës Vjetore të Prokurorëve të Kosovës`, prokurorët e prokurorive themelore kanë zhvilluar procesin zgjedhor për përzgjedhjen e anëtarit të ri të Këshillit Prokurorial të Kosovës. Pas numërimit të votave, me 74 vota nga 132 të vlefshme, anëtare e re u zgjodh Elza Bajrami-Kastrati, zëvendëskryeprokurore në Prokurorinë Themelore të Prishtinës. Kandidatja tjetër, Merita Kurtishi-Gaka, mori 58 vota.
Përmes një njoftimi për medie nga Sistemi Prokurorial bëhet e ditur se procesi u zhvillua në përputhje me dispozitat ligjore në fuqi dhe duke respektuar parimin e përfaqësimit të gjinisë së nënpërfaqësuar në organet udhëheqëse të sistemit prokurorial.
Kryesuesi i KPK-së, Ardian Hajdaraj, vlerësoi rëndësinë e këtij procesi demokratik dhe profesional, duke theksuar se përkushtimi i anëtares së re do të jetë kyç për forcimin e sundimit të ligjit dhe ruajtjen e integritetit institucional të Këshillit Prokurorial.
“Komisioni Zgjedhor, nën kryesimin e Arian Gashit, verifikoi dhe numëroi votat, ndërsa në proces morën pjesë gjithsej 135 prokurorë, nga të cilët tri fletëvotime u shpallën të pavlefshme. Përfaqësues të shoqërisë civile dhe partnerëve ndërkombëtarë monitoruan procesin për të garantuar transparencë, besueshmëri dhe respektim të standardeve procedurale”, thuhet në njoftim.
Anëtarja e re e KPK-së do të ushtrojë funksionin e saj për një mandat pesëvjeçar, duke kontribuar në avancimin e drejtësisë dhe funksionimin efikas të Sistemit Prokurorial në Kosovë.
