RTK po kalon një periudhë sfiduese për shkak të mungesës së buxhetit dhe çdo angazhim institucional për zgjidhje është jetik, deklaroi u.d. i drejtorit të përgjithshëm të Radiotelevizionit të Kosovës, Hysen Hundozi.
Sipas tij, deklarata e presidentes së vendit, Vjosa Osmani, lidhur me çështjen e buxhetit të RTK-së, është shumë inkurajuese për tejkalimin e situatës së vështirë nëpër të cilën po kalon transmetuesi publik, për herë të dytë sivjet.
“Shprehja e gatishmërisë së saj për të ndihmuar në gjetjen e një zgjidhjeje dhe për të tejkaluar pengesat procedurale në Kuvend, është një hap i rëndësishëm drejt sigurimit të funksionimit normal të RTK-së si institucion i pavarur dhe i domosdoshëm për informimin e qytetarëve”, nënvizoi Hundozi.
Ai ftoi të gjitha subjektet politike parlamentare që, përtej dallimeve, të kontribuojnë në këtë drejtim, në mënyrë që të sigurohet stabiliteti institucional dhe vazhdimësia e punës së transmetuesit publik.
“E kuptoj plotësisht shqetësimin e kolegëve tanë, dhe ata dua t’i siguroj se menaxhmenti është i angazhuar maksimalisht për të gjetur një zgjidhje për situatën aktuale dhe, ashtu si herën e kaluar, ne do të bëjmë çdo përpjekje për të garantuar vazhdimësinë e punës dhe respektimin e detyrimeve ndaj secilit punëtor”, theksoi Hundozi.
Tutje, ai sqaroi se funksionimi i RTK-së është i garantuar me Kushtetutë dhe ligje, dhe përbën një element themelor të një shoqërie demokratike dhe të informuar.
