Në fshatin Debellde të Vitisë, ku ka kohë që kërkohet hapja e një pike kufitare, që, pos qarkullimit më të lehtë e më të shpejtë për banorët e zonës dhe më gjerë, do të mundësonte edhe zhvillimin ekonomik dhe turizmin malor.
Hapja e një pike kufitare mes Kosovës dhe Maqedonisë së Veriut, në fshatin Debëllde, do të integronte fshatra të tëra të brezit kufitar, duke shkurtuar kilometrat e lëvizjes vajtje-ardhje.
Investimet në infrastrukturë janë një tjetër indikacion që ndikon në mosbraktisjen e zonave rurale dhe shndërrimin e tyre në vende atraktive për turizëm, që ndikon në zhvillimin e ekonomive familjare.
“E shkurton rrugën për 25-30 kilometra mundem me thanë lirshëm se ka njerëz, qytetar tanë të mërgatës që udhëtojnë në aeroportin e Shkupit edhe e kanë shumë më afër të vijnë përmes pikës kufitare të Debëlldehit. Gjithashtu edhe familjarët të cilët kanë lidhje familjare me fshatin Tanushë, Brezë, Malinë, Likovë e kështu fshatra tjera që do të shkurtonte rrugën dhe komunikimin e ndërsjellë”, tha për RTK, Isa Hasani, banor i Debëlldesë.
“Lehtësimi u bë shumë i madh se përpara rruga ka qenë shumë me baltë, ka qenë e pa kalueshme po me shtrimin e rrugës me asfalt shumë është lehtësuar, si për këmbësor si për automjete si për shëtitore edhe për shumë të tjera sene”, tha Feriz Zeneli, banor i fshatit Shusht, Viti.
Angazhim edhe më i madh për ta bërë jetën e banorëve më të lehtë, pritet si nga institucionet lokale po ashtu edhe nga ato qendrore. Zyrtarë komunalë nënvizojnë se ky angazhim do të ishte joshje për investime përmes projekteve të përbashkëta ndërkufitare.
“Këtu është investim i Bashkimit Evropian i bashkëpunimit ndërkufitar projekte të cilat ne i kemi ideuar edhe i kemi fituar. Tashmë e kemi një frekuentim të madh nga gjithë regjioni që vijnë në Debëlldeh por javën e kaluara e kam përsërit kërkesën për pikën kufitare në mes Debëlldehit dhe Tanushës, për shkak se një brez i tërë që lidhet farefisnisht, gjeografikisht, por lidhet edhe n zonë në aspekti ekonomik, qarkullim zonë të njerëzve dhe mallrave”, tha Sokol Haliti, kryetar i Vitisë.
Fqinjësia e mirë mes Kosovës dhe Maqedonisë së Veriut, me hapjen e pikës kufitare mes tyre, do të shtonte mundësi më të madhe dhe më të shpejtë për qarkullim dhe zhvillim të kësaj zone ekologjike me përfitime të shumta socio-ekonomike.
