Kalimi aktual i Ngushticës së Mesinës zgjat rreth njëzet minuta, ndërsa i gjithë procesi i ngarkimit dhe shkarkimit, ose çmontimit dhe rimontimit të trenit, zakonisht zgjat një orë.Një linjë unike treni, Intercity Notte, operon çdo ditë midis Italisë kontinentale dhe Siçilisë , treni i fundit në Evropë që “hipn” me traget . Kjo linjë lidh Milanon, Romën dhe Napolin me Palermon dhe Sirakuzën, dhe kalon Ngushticën e Mesinës me një traget të përshtatur posaçërisht.
Në qytetin e Villa San Giovanni, treni çmontohet në pjesë dhe çdo vagon ngarkohet në një traget të pajisur me shina. Kur trageti ankorohet në Messina të Siçilisë, procesi është i kundërt: vagonët shkarkohen dhe rimontohen në një tren të plotë që vazhdon udhëtimin e tij rreth ishullit.
Shërbimet e trageteve përmes Ngushticës së Mesinës u prezantuan në vitin 1899 për të lidhur Siçilinë me rrjetin kombëtar hekurudhor italian. Linjat hekurudhore tokë-det ekzistonin edhe në vende të tjera të Evropës, si midis Francës dhe Anglisë dhe në Gjermani dhe Danimarkë.
Megjithatë, relativisht kohët e fundit, për shkak të ndërtimit të urave ose tuneleve, ose për shkak të interesit të zvogëluar, linja të tjera të tilla janë ndërprerë (Puttgarden–Rødby në vitin 2019 dhe Sassnitz–Trelleborg në vitin 2020), kështu që sot Ngushtica e Mesinës është i vetmi vend në Evropë ku trenat e pasagjerëve kalojnë detin me traget.
Sipas të dhënave të Trenitalia-s, më shumë se 60% e pasagjerëve e përdorin këtë linjë treni Intercity Notte për udhëtime argëtimi (çmimi është rreth pesëdhjetë euro), ndërsa një pjesë më e vogël janë ata që udhëtojnë për biznes dhe ata që jetojnë në Siçili.
Linja e trenit të natës nga Milano në Sirakuzë është 1489 kilometra e gjatë – më e gjata me vagona gjumi në Itali – udhëtimi zgjat rreth 20 orë. Me linja ditore nga Roma dhe Napoli, Siçilia mund të arrihet në 9 dhe 11 orë e gjysmë.
Nëse doni ta përjetoni këtë udhëtim të pazakontë, ndoshta duhet ta ndërmerrni së shpejti. Në gusht të vitit 2025, qeveria italiane riaktivizoi planet për të ndërtuar një urë të varur mbi Ngushticën e Mesinës, një projekt prej 13.5 miliardë eurosh që konsiderohet si një nga projektet më ambicioze të infrastrukturës në Evropë.
