Presidenti rus Vladimir Putin dëshiron të qëndrojë në pushtet deri në vitin 2050, sipas tabloidit britanik Daily Star, duke cituar gazetarin investigativ Ilya Davlyatchin.
Sipas tij, Putin 73-vjeçar, i cili e ka mbajtur tashmë kryesimin e Kremlinit më gjatë se çdo sundimtar tjetër që nga Jozef Stalini, do të donte ta mbante pushtetin deri në moshën 97 vjeç dhe më pas ndoshta t’ia dorëzonte atë djalit të tij, Ivanit. Ai është aktualisht 10 vjeç dhe do të jetë 35 vjeç në vitin 2050.
Kushtetuta aktuale, e rishkruar në vitin 2020 për të rivendosur kufirin e mandatit të Putinit, i lejon atij të mbetet president deri në vitin 2036, ose deri në moshën 83 vjeç.
Për sa i përket kohëzgjatjes së sundimit, Putini e ka tejkaluar tashmë Pinochetin (17 vjet), Kim Jong-ilin (17 vjet), Benito Musolinin, diktatorin indonezian Suharto (20 vjet) dhe Nicolae Ceausescun, i cili udhëhoqi Rumaninë për 24 vjet. Deri në fund të mandatit të tij të pestë, Putini mund ta tejkalojë Mao Ce Dunin, dhe në të gjashtin, ai mund të arrijë Francisco Franco-n (Spanjë) dhe António de Salazarin (Portugali), të cilët sunduan secili për 36 vjet.
Nëse Putini mbetet në pushtet deri në vitin 2050, ai do të tejkalojë Muammar Gaddafin (42 vjet), Kim Il-sungun (46 vjet) dhe Fidel Kastron (49 vjet) dhe do të bëhet sundimtari më jetëgjatë i Rusisë që nga Ivani i Tmerrshëm, i cili sundoi për 50 vjet (duke përfshirë fëmijërinë e tij, kur drejtimi aktual i shtetit iu besua bojarëve).
Rrethi i ngushtë i Putinit po ndjek në mënyrë aktive çështjet e zgjatjes së jetës së presidentit rus dhe në shtator, Ministria e Shëndetësisë u udhëzua të mblidhte urgjentisht të gjitha kërkimet shkencore të disponueshme mbi anti-plakjen, raportoi The Times vitin e kaluar, duke cituar burime të njohura me situatën.
Sipas raportimeve të medias, projekti i “kurës kundër plakjes” po mbikëqyret nga 77-vjeçari Mikhail Kovalchuk, një nga miqtë e ngushtë të Putinit dhe kreu i Institutit të Kërkimeve Bërthamore Kurchatov. Vajza e madhe e Putinit, endokrinologia Maria Vorontsova, është gjithashtu e përfshirë.
