FR: Vuçiç nuk di si t’i qetësojë protestat dhe faljet e tij nuk janë bindëse

Tubimi masiv në Novi Sad tregoi se Presidenti i Serbisë, Aleksandar Vuçiç, nuk mund t’i injorojë thjesht protestat, as t’i qetësojë ato, dhe as kthesa e tij retorike dhe deklarata se pendohet për gjithçka që tha për protestuesit nuk ishte bindëse, shkruan sot e përditshmja Frankfurter Rundschau (FR).

E përditshmja gjermane shkruan se studentët mobilizuan përsëri të gjithë vendin duke ecur për disa ditë deri në Novi Sad dhe se njerëzit nuk u “frikësuan nga ndërprerja e lidhjeve të trenave dhe autobusëve për shkak të kërcënimeve të supozuara me bomba”, as nga “punët e ndërtimit në hyrjet për në Novi Sad”.

“Pa sukses, sundimtari dhe shoqëruesit e tij i fyen studentët si terroristë ose fashistë, i akuzuan ata për rituale satanike ose se po përgatitnin sulme të përgjakshme”, shkruan FR.

Gazeta shkruan se Vuçiç, kur një gazetar e pyeti se çfarë pret të shtunën në Novi Sad, “u përgjigj me paturpësi: “Çfarë po ndodh, a është një ndeshje futbolli?”.

Në këtë masë, “kthimi i tij retorik që ai kameleon politik u përpoq ta performonte në momentin e fundit, në prag të përkujtimit në Novi Sad, dukej pak bindës. Ai pendohet për gjithçka që tha për protestuesit dhe se është gati për dialog, edhe nëse protestat nuk i zgjidhin problemet”, shkruan FR.

Studentët, në reagimet e tyre fillestare, thanë se kërkimfalja ishte hipokrite dhe shumë e vonë.

“Komplotuesi kryesor, i cili në shtator lejoi policinë të rrihte demonstruesit, t’i qëllonte me plumba gome ose t’i hidhte në burg, po bëhet shkaku i problemeve në Serbi për gjithnjë e më shumë njerëz”, përfundon FR.

Gazeta shton se sondazhet tregojnë se Partia Progresive Serbe në pushtet dhe vetë Vuçiç kanë humbur besimin e qytetarëve.