Blegtorët në Dukagjin po ankohen për mbështetje të vogël institucionale për punimin e tokave, mbajtjen e deleve e të kafshëve të tjera si pasojë e mungesës së makinerive, ujit e të tjerë.
Blegtorët dukagjinas që tradicionalisht janë marrë me këtë veprimtari jo pak fitimprurëse janë të shqetësuar për rënien e numrit të bagëtisë kohëve të fundit. E gjithë kjo, thonë ata, si pasojë e përkrahjes së pamjaftueshme nga ana e institucioneve.
“E kam nis me pak por tash kam rreth 300 krerë dele. Mirë është puna me to duhet me thanë i lumi ai që i ka e mundet me i këqyrë, të ardhurat janë shumë të mira por ne na duhet një përkrahje më e madhe nga shteti se nuk kemi ujë e banë gjithë at mundi e prodhim nuk ke. As ke fryt as asgjë edhe ujë s’ke ku ju jep deleve sot. Ja shihe me rezervar ku e kam këtu të mbushur se nuk ke ku u jep ujë e lere më diçka tjetër, Unë nuk e di a i bie dikujt ndërmend për këtë”, tha Nezir Rexha, blegtor nga komuna e Gjakovës.
“Deri më tash qe 25 vjet pas lufte asnjë përfaqësues institucioni nuk më ka ardhur në shtëpi me më thanë Abedin a ke nevojë për diçka për më jep pak vullnet. Me i rritë makinerinë me na ndihmua me do lehtësime me marrë mjete bujqësore. Komuna diçka është interesua na ka ndihmua me nga pak sende por këto janë të vogla. Duhet unë si fermer me e pas derën hapur, unë atëherë e kam vullnetin edhe ma të madh, e rrisë blegtorinë edhe ma shumë”, tha Abedin Binakaj, blegtor nga komuna e Deçanit.
Para një situate të tillë, kur numri i bagëtisë po pëson rënie, njohësit e fushës së blegtorisë thonë se institucionet duhet ta rrisin përkrahjen.
“Kështu që kisha bërë apel edhe te institucionet lokal, e qendrore që në planet e ardhshme zhvillimore, në strategjitë e ardhshme të stimulohen blegtorët të cilët donë me i shtua tufat e tyre dhe blegtorët e ri nëse donë me u marrë me blegtori t’iu mundësohet shtimi i krerëve të deleve”, tha Bajram Çeku, njohës i blegtorisë.
Ndërkaq, zyrtarët për Bujqësi premtojnë se edhe zgjidhja e problemit të ujitjes për pronat e tyre do të realizohet shumë shpejt.
“Kemi filluar me kontratën e re të kanaleve të ujitjes edhe sipas kërkesave të fermerëve dhe banorëve të fshatrave ne do ta realizojmë në mënyrë që t’u lehtësohet puna edhe të kenë fryt apo bereqet ma shumë fermerët”, tha Gani Hajdari, drejtor i DBZHR Gjakovë.
Sipas statistikave zyrtare, para rreth tri dekadash, në Rrafshin e Dukagjinit numëroheshin rreth 50 mijë krerë dele e po ashtu edhe numri i gjedheve ishte shumë i madh.
