Në Shpenadi të Prizrenit sot është shënuar një moment i rëndësishëm kulturor dhe historik për komunitetin lokal. Banorë të fshatit, historianë dhe përfaqësues institucionalë janë mbledhur për të qenë pjesë e zbulimit të përmendores së Lekë Dukagjinit, një figurë që vazhdon të mbetet simbol i rendit tradicional dhe identitetit kombëtar.
Në fshatin Shpenadi të Prizrenit është zbuluar përmendorja e Lekë Dukagjinit, e ndërtuar si shenjë nderimi për figurën historike që la gjurmë të thella në identitetin dhe traditën shqiptare. Ceremonia ka mbledhur banorë të zonës, përfaqësues lokalë dhe historianë, të cilët theksuan rëndësinë e kësaj simbolike për ruajtjen e trashëgimisë kulturore.
“Shtatorja e Lekës nuk është vepër monumenti prej guri apo bronzi por një simbol krenarie kombëtare një kujtesë e përjetshme për të kaluarën tonë të lavdishme ajo na kujton çdo ditë se kush jemi, nga vijmë, dhe çfarë duhet të mbrojmë. Me përkushtimin tuaj kjo shtatore ka rifituar madhështinë që meriton duke u kthyer në një pikë referimi për çdo vizitor dhe çdo brezi të ri”, tha Arianit Çollaku, përfaqësues i shoqatës “Lekë Dukagjini”, Shpenadi
“Sa më shumë të dimë të afirmojmë të kaluarën vlerat tona kombëtare trashëgimin kulturore siç po e bëjmë sot këtu në një masë të madhe të ndihmojmë ofrimit mes nesh edhe me një masë të madhe të ndihmojmë edhe krijimit të ardhmen sa më të mirë”, tha Shaqir Totaj, kryetar i Prizrenit
Në ceremoni të pranishëm ishin dhe klerikë fetarë të cilët thanë se kjo është një dëshmi se në këtë vend feja nuk shihet si një vijë ndarëse, por si një urë bashkimi për kombin shqiptar.
“Kjo ngjarje sot dëshmon që njeriu nuk vdes por jeton për amshim e veçantë jetojnë ata që në jetën e tyre kanë lanë gjurmë të pashlyeshme në jetë e në histori ashtu sikur që edhe Lekë Dukagjini i cili jetoj në të njëjtën kohë me Skënderbeun që ishin aq shumë të afërm dhe bashkëpunëtor”, tha monsignor Rok Gjon Lleshi
“Populli shqiptar po bashkohet o afrohet po konsolidohet në rrugën e atyre në rrugën e atyre që dhanë më të shtrenjtën. më kujtohet një thënie e Hasan Prishtinës që thotë njeriu i ditur është si harta hartën njeriu kur e ka përpara nuk e humbë rrugën kurrë edhe ne na kanë mësuar ata të parët që rrugën nuk e humbim kurrë por heqim përpara dhe populli shqiptarë shkon tu forcu dhe ti nderua heronjtë e vet edhe tu e nderua edhe Lekë Dukagjinin përherë në këto troje”, tha mulla Nebi Daka.
Vendosja e shtatores së Lekë Dukagjinit u pa si një hap që forcon kujtesën kolektive dhe rikujton se vlerat kombëtare mbeten shtylla që i mban njerëzit e bashkuar, pavarësisht kohës dhe sfidave.
