Kryetari i Partisë Demokratike të Kosovës (PDK), Memli Krasniqi, ka deklaruar se Mitrovica është bashkuar rreth kandidatit të kësaj partie për kryetar komune, Arian Tahiri.
Në një tubim zgjedhor të mbajtur në Mitrovicë, Krasniqi tha se qytetarët po i bashkohen vizionit për një “Mitrovicë që punon, që bashkon dhe që beson”, duke shtuar se Tahiri tashmë përfaqëson të gjithë qytetarët, pa dallime politike.
“Mitrovica është bashkuar me Arian Tahirin për të ardhmen e saj. Qindra qytetarë nga çdo lagje e çdo pjesë e qytetit janë bashkuar me një zotim të përbashkët për Mitrovicën që punon e që beson,” u shpreh Krasniqi.
Kryetari i PDK-së e vlerësoi Tahirin si vazhdimësi të qeverisjes së mirë të ish-kryetarit Bedri Hamza, duke theksuar se puna dhe besimi ndaj qytetarëve janë vlerat kryesore të kësaj partie.
“Ariani, me edukatën dhe vlerat e tij, mishëron drejtimin për të cilin ky qytet qëndron. Ai përfaqëson vazhdimësinë e një kryetari të mirë, si Bedri Hamza, që besimin e qytetarëve e ka të shenjtë – ndërsa punën e ka valutë”, shtoi Krasniqi.
Në përfundim të fjalës së tij, ai u bëri thirrje qytetarëve të Mitrovicës që më 9 nëntor të votojnë për zhvillim dhe për “Mitrovicën që fiton sërish”.
