Kryetari i Partisë Demokratike të Kosovës (PDK), Memli Krasniqi, përmes një postimi në Facebook, ka shënuar nisjen zyrtare të fushatës për balotazhin e 9 nëntorit, duke e quajtur atë “rrugën drejt fitores së madhe të punës, besimit dhe përvojës”.
Krasniqi ka theksuar se PDK garon në gjashtë komuna me kandidatë të dëshmuar dhe me programe konkrete: Shaqir Totaj në Prizren, Arian Tahiri në Mitrovicë, Ferit Idrizi në Vushtrri, Sabedin Vishi në Kaçanik, Sokol Bashota në Klinë dhe Shaban Shabani në Dragash.
“Shaoqir Totaj në Prizren, Arian Tahiri në Mitrovicë, Ferit Idrizi në Vushtrri, Sabedin Vishi në Kaçanik, Sokol Bashota në Klinë dhe Shaban Shabani në Dragash janë, para së gjithash, njerëz të ndershëm, por edhe kryetarë të zotë, të afërt me qytetarët dhe të përkushtuar për të ardhmen e komunave të tyre”, ka shkruar ai.
Kreu i PDK-së ka vlerësuar punën e kryetarëve aktualë nga radhët e partisë, duke theksuar se ata kanë arritur rezultate të jashtëzakonshme edhe pa mbështetjen e nivelit qendror.
“Balotazhi i 9 nëntorit është një mundësi për vazhdimin e shembullit më të mirë të qeverisjes lokale që PDK e ka vendosur si standard në Kosovë, kudo që ka qeverisur”, ka shtuar Krasniqi.
Ai ka bërë thirrje për mbështetje të kandidatëve të PDK-së, duke theksuar se 9 nëntori është “dita e qytetarëve, dita e vlerave dhe dita e fitores”.
“Voto PDK 191! Sepse komunat tona meritojnë më mirë”, ka përfunduar Krasniqi.
