Lidhja Demokratike e Kosovës ka hapur fushatën për balotazh në Prishtinë në një tubim me banorët e Kodrës së Trimave.
Lideri i LDK-së Lumir Abdixhiku falënderoi banorët e kësaj pjese të kryeqytetit për votën që i kanë dhënë LDK-së në raundin e parë të zgjedhjeve lokale.
Abdixhiku u shpreh i bindur se LDK do të fitojë balotazhin e do të udhëheqë me kryeqytetin edhe në katër vitet e ardhshme.
“Më 12 tetor ju folët qartë. Tani kam një thirrje për ju më 9 nëntor, një javë nga sot të flisni edhe më qartë. Prishtina le të flet e para, Prishtina është e kaltër, Prishtina është me LDK-në, Prishtina është me Përparim Ramën dhe s’ka asgjë që e ndryshon këtë. 9 nëntori, sot një javë, në orën 7 siç jemi mbledhur këtu, ju ftoj nga tash të mblidhemi të gjithë në Sheshin “Ibrahim Rugova” për të bërë festën e madhe të Prishtinës e për të shënuar katër vitet e ardhshme të Përparimit e LDK-së, në Prishtinë”, tha Abdixhiku.
Ndërkaq, kandidati i kësaj partie që synon edhe një mandat, Përparim Rama tha se LDK-ja ka bërë punë madhështore në Prishtinë.
“Kemi bërë një punë madhështore së bashku tash e katër vite, do të jemi së bashku edhe katër vite të tjera që ta bëjmë transformimin e Prishtinës ashtu sic e meriton. Kemi vetëm edhe 6 ditë, sepse të shtatën duhet të shkojmë e të votojmë e pastaj në sheshin “Ibrahim Rugova” ta festojmë fitoren e madhe”, tha Rama.
Lidhja Demokratike e Kosovës ka vazhduar aktivitetin edhe në një tjetër lagje të kryeqytetit.
Në “Kolovicë” premtuan vazhdim të transformimit të kryeqytetit, derisa ftuan banorët që më 9 nëntor të votojnë për Përprarim Ramën.
“LDK-ja fiton Prishtinën më 9 nëntor, por kjo fitore nuk duhet të jetë e zakonshme. Duhet të jetë fitore e thellë, duhet të jetë fitore e plotë”, tha Abdixhiku.
Kandidati i LDK-së për Prishtinën, Përparim Rama i bindur në fitore tha se bashkë me qytetarët do të vazhdojnë transformimin e kryeqytetit.
“E keni parë transformimin, po e shihni transforimin tonë çdo ditë. E kur këtë e panë kundërshtarët tanë filluan të na bllokojnë. Por, e keni parë që nuk kanë mundur të na ndalin për katër vjet, nuk do të na ndalin asnjëherë, kurrë. Kemi treguar që kemi vizion, kemi treguar që dimë, që duam, që jemi të guximshëm, që jemi profesionistë. Kemi treguar që ne jemi të vetmit që e kemi me të vërtetë që e bëjmë me zemër, që e meritojmë me 9 nëntor të ecim përpara së bashku për Prishtinën tonë të zemrës”, tha Rama.
