Sindikata e Pavarur e Radiotelevizionit të Kosovës dhe Shoqata Sindikale e Radio Kosovës kanë shprehur indinjatën dhe shqetësimin e thellë për mos-transferimin e buxhetit të RTK-së nga ana e institucioneve përkatëse, buxhet ky që është miratuar me ligj qysh para një viti në Kuvendin e Kosovës.
Sipas këtyre sindikatave, këto vonesa në transferimin e buxhetit po e vënë në rrezik serioz funksionimin e transmetuesit publik dhe po ndikojnë drejtpërdrejt në sigurinë ekonomike e sociale të punëtorëve të mediumit publik, të cilët edhe sot, më datë 3 nëntor, janë pa paga dhe, rrjedhimisht, pa mundësi për të kryer obligimet ndaj bankave dhe ato ditore familjare.
“Përmes këtij veprimi po cenohet jo vetëm e drejta themelore e punëtorëve për pagë të rregullt dhe kushte të dinjitetshme pune, por edhe vetë pavarësia dhe misioni publik i RTK-së”, thuhet në reagimin e përbashkët të këtyre dy sindikatave.
Sindikata e Punëtorëve të RTK-së dhe Shoqata Sindikale e Radio Kosovës e konsiderojnë të papranueshme që një institucion publik, i cili mbart misionin kushtetues të informimit të qytetarëve, të vihet në pozitë pasigurie për shkak të mosveprimit institucional.
“Financimi i plotë dhe në kohë i RTK-së nuk është privilegj, por obligim ligjor dhe moral ndaj mediumit publik dhe atyre që çdo ditë mbajnë në funksion këtë institucion. RTK nuk duhet të shndërrohet në instrument të pazareve politike. Financimi i RTK-se nuk mund të mbetet peng i marrëveshjeve mes partive politike apo të përdoret për kalkulime politike. Si transmetues publik, RTK ka një mision të qartë: t’u shërbejë qytetarëve me informim të pavarur, profesional dhe të paanshëm”, thuhet tutje në reagim.
Sindikata e Punëtorëve të RTK-së dhe Shoqata Sindikale e Radio Kosovës i bëjnë thirrjen e fundit Kuvendit të Kosovës si themelues, Presidentes së vendit dhe Qeverisë në detyrë që urgjentisht të ndërmarrin hapat e nevojshëm për ekzekutimin e buxhetit të mbetur të RTK-së, në mënyrë që të shmangen protestat dhe grevat e punëtorëve në këtë periudhë kaq të ndjeshme për vendin, një javë para balotazhit të zgjedhjeve lokale dhe potencialisht disa javë para zgjedhjeve nacionale të paralajmëruara.
“Sindikata e Punëtorëve të RTK-së dhe Shoqata Sindikale e Radio Kosovës mbeten të vendosura në mbrojtjen e drejtave të punëtorëve te RTK-së dhe mbrojtjen e integritetit të transmetuesit publik, duke mos përjashtuar asnjë formë demokratike të reagimit sindikal në rast të moszgjidhjes së menjëhershme të kësaj çështjeje”, thuhet tutje në reagim.
