Ministri në detyrë i Punëve të Brendshme, Xhelal Sveçla, ka reaguar pas incidentit të fundit në zonën kufitare mes Kosovës dhe Serbisë, ku dyshohet se xhandarmëria serbe ka plagosur dhe rrëmbyer një shtetas të Republikës së Kosovës me inicialet M.V.
Sveçla tha se Serbia po vazhdon me veprime destabilizuese që, siç theksoi ai, cenojnë hapur integritetin territorial të Republikës së Kosovës, kësaj radhe në zonën e njohur si “pika zero (0)”, ku ka prani të shtuar të KFOR-it.
“Në vazhdën e politikave të saj të frikësimit dhe përndjekjeve ndaj qytetarëve që nuk i binden regjimit të Vuçiqit, xhandarmëria serbe ka plagosur, duke tentuar ta vrasë, dhe më pas e ka rrëmbyer një qytetar të Republikës së Kosovës”, ka deklaruar Sveçla.
Ai kujtoi se ky është një akt i përsëritur dhe i pandëshkuar, duke përmendur rastin e para dy viteve kur njësitë speciale të Serbisë hynë në territorin e Kosovës dhe rrëmbyen tre pjesëtarë të Policisë së Kosovës, ndërsa më pas ndodhi sulmi terrorist në Banjskë.
“Në anën tjetër, Serbia po vazhdon politikën e terrorit dhe dhunës ndaj atyre që nuk pajtohen me politikat agresore të Aleksandër Vuçiqit”, shtoi Sveçla.
Ministri në detyrë e ka cilësuar këtë qasje si agresive dhe provokuese, duke theksuar se përbën shkelje të rëndë të kufijve shtetërorë dhe të drejtave të qytetarëve të Kosovës.
“Është koha e fundit që faktori ndërkombëtar të reagojë me veprime të qarta dhe ndëshkuese ndaj Serbisë, në mënyrë që këto akte armiqësore të mos përsëriten më kurrë”, ka shkruar Sveçla.
